डॉ. अंजलीताई निंबाळकर यांच्या मार्गदर्शनातून कर्नाटक सरकारकडून नियुक्ती; काँग्रेस कार्यकर्त्यांमध्ये उत्साहाचे वातावरण
खानापूर : खानापूर तालुक्यातील लक्केबैल गावचे रहिवासी तथा खानापूर तालुका ब्लॉक काँग्रेसचे माजी अध्यक्ष महादेव कोळी यांची सौंदत्ती येथील श्री रेणुका यल्लम्मा देवी मंदिर विकास प्राधिकरणावर निवड करण्यात आली आहे. एआयसीसीच्या राष्ट्रीय सचिव तथा खानापूरच्या माजी आमदार डॉ. अंजलीताई हेमंत निंबाळकर यांच्या मार्गदर्शनाखाली कर्नाटक सरकारने ही नियुक्ती केल्याने खानापूर तालुक्यात आनंदाचे वातावरण निर्माण झाले आहे.
कर्नाटकातील सौंदत्ती येथील श्री रेणुका यल्लम्मा देवी मंदिर हे लाखो भाविकांचे श्रद्धास्थान आहे. दरवर्षी कर्नाटकासह महाराष्ट्र आणि देशाच्या विविध भागांतून मोठ्या संख्येने भाविक या तीर्थक्षेत्राला भेट देऊन देवीचे दर्शन घेतात. या प्रसिद्ध धार्मिक स्थळाच्या धार्मिक, सांस्कृतिक तसेच विकासात्मक कामांना चालना देण्यासाठी मंदिर विकास प्राधिकरणाची भूमिका अत्यंत महत्त्वाची मानली जाते.
महादेव कोळी यांनी खानापूर तालुका ब्लॉक काँग्रेसचे अध्यक्ष म्हणून काम पाहताना तालुक्यात काँग्रेस पक्षाची संघटना मजबूत करण्यासाठी महत्त्वपूर्ण योगदान दिले आहे. सामाजिक आणि राजकीय क्षेत्रातही ते सक्रिय असून, त्यांच्या कार्याची दखल घेत त्यांना मंदिर विकास प्राधिकरणावर काम करण्याची संधी देण्यात आली आहे.
डॉ. अंजलीताई निंबाळकर यांच्या मार्गदर्शनातून झालेल्या या निवडीमुळे खानापूर तालुक्याला महत्त्वाचे प्रतिनिधित्व मिळाले आहे. त्यांच्या या निवडीमुळे काँग्रेस पदाधिकारी आणि कार्यकर्त्यांमध्ये उत्साहाचे वातावरण असून, महादेव कोळी यांच्यावर विविध स्तरांतून अभिनंदनाचा वर्षाव होत आहे.
या नियुक्तीमुळे सौंदत्ती येथील श्री रेणुका यल्लम्मा देवी मंदिराच्या विकासकामांमध्ये खानापूर तालुक्याचा सहभाग वाढण्यास मदत होईल, अशी अपेक्षा व्यक्त केली जात आहे. महादेव कोळी यांच्या निवडीचे खानापूर तालुक्यात स्वागत होत असून, त्यांच्या पुढील कार्यासाठी सर्व स्तरांतून शुभेच्छा दिल्या जात आहेत.
