उचगाव : जायंट्स ग्रुप ऑफ बेळगाव मेन यांच्या वतीने पंतप्रधान नरेंद्र मोदी यांच्या ‘प्लास्टिक हटाव, देश बचाव’ या घोषवाक्याला अनुसरून देश प्लास्टिकमुक्त करण्याच्या उद्देशाने विविध उपक्रम राबविण्यात येत आहेत. त्याचाच एक भाग म्हणून उचगाव येथील श्री मळेकरणी देवस्थान आणि सुळेभावी येथील श्री महालक्ष्मी मंदिर येथे मोठे डस्टबीन देण्यात आले.
या डस्टबीनमध्ये एकावेळी सुमारे २०० ते २५० रिकाम्या प्लास्टिकच्या बाटल्या जमा करता येणार आहेत. डस्टबीनच्या मागील बाजूस असलेल्या छोट्या दरवाजातून या बाटल्या सहजपणे बाहेर काढता येतील. त्यामुळे मोठ्या प्रमाणात प्लास्टिकच्या बाटल्या एकाच ठिकाणी संकलित करून त्यांची योग्य पद्धतीने विल्हेवाट लावण्यास मदत होणार आहे.
याच उपक्रमांतर्गत श्री महालक्ष्मी मंदिर, सुळेभावी येथेही आणखी एक मोठे डस्टबीन पुजारीजींकडे सुपूर्द करण्यात आले. या मंदिरात भाविकांची मोठी गर्दी होत असल्याने प्लास्टिकच्या बाटल्यांचा मोठ्या प्रमाणावर वापर होतो. त्यामुळे मंदिर परिसरात प्लास्टिक कचरा जमा होऊ नये, यासाठी हे डस्टबीन ठेवण्यात आले आहे.
उचगाव येथील श्री मळेकरणी देवस्थान आणि सुळेभावी येथील श्री महालक्ष्मी मंदिर अशा दोन धार्मिक स्थळांवर डस्टबीन उपलब्ध करून देण्यात आले आहेत. विशेष म्हणजे, ही दोन्ही डस्टबीन सदस्य श्री. गोविंद टक्केकर यांनी देणगीदाखल दिली आहेत.
यावेळी अध्यक्ष लक्ष्मण शिंदे, उपाध्यक्ष अरुण काळे, फेडरेशन ऑफिसर सुनील मुतगेकर, को-ऑर्डिनेटर अशोक हलगेकर, माजी अध्यक्ष शिवराज पाटील, उमेश पाटील, सदस्य ईश्वर पाटील, पुंडलिक पावशे, राहुल बेलवलकर, वाय. एन. पाटील आदी उपस्थित होते.
प्लास्टिक कचऱ्याचे संकलन करून त्याची योग्य विल्हेवाट लावण्याच्या या उपक्रमातून **‘प्लास्टिक हटाव, देश बचाव’**चा संदेश प्रत्यक्ष कृतीतून देण्यात आला आहे.
