राज्य मराठी विकास संस्था, मुंबई यांच्या सहकार्याने टिळकवाडी येथील कार्यालयात वाचन संस्कृती संवर्धनाचा उपक्रम
बेळगाव : प्रतिनिधी
‘आम्हा घरी धन शब्दांचीच रत्ने’ या संतवचनाला साजेसा उपक्रम राबवत महाराष्ट्र एकीकरण युवा समिती, बेळगाव यांच्या वतीने आणि राज्य मराठी विकास संस्था, मुंबई यांच्या सहकार्याने टिळकवाडी येथील युवा समितीच्या कार्यालयात ग्रंथालयाचा शुभारंभ उत्साहात करण्यात आला. मराठी भाषा, साहित्य, संस्कृती आणि वाचन परंपरेचे संवर्धन करण्याच्या दृष्टीने हा उपक्रम महत्त्वपूर्ण मानला जात आहे.
कार्यक्रमाची सुरुवात युवा समितीचे अध्यक्ष अंकुश केसरकर यांच्या हस्ते छत्रपती शिवाजी महाराजांच्या प्रतिमेचे तसेच विविध ज्ञानग्रंथांचे पूजन करून करण्यात आली. त्यानंतर उपस्थित बालचमू, कार्याध्यक्ष सचिन केळवेकर, खजिनदार विनायक कावळे, सूरज कुडूचकर, साईनाथ शिरोडकर, प्रतीक पाटील, आकाश भेकणे, प्रवीण रेडेकर, विनायक मोरे, महेश जाधव, महेश जायनाचे, आनंद पाटील, विकास भेकणे आदी मान्यवर व पदाधिकाऱ्यांच्या हस्ते दीपप्रज्वलन करून ग्रंथालयाचे औपचारिक उद्घाटन करण्यात आले.
संयुक्त महाराष्ट्र चळवळीपासून मराठी साहित्यापर्यंत विविध ग्रंथ उपलब्ध
या ग्रंथालयात संयुक्त महाराष्ट्र चळवळीचा इतिहास आणि संदर्भग्रंथ, समृद्ध मराठी वाङ्मय, थोर व्यक्तींची चरित्रे, प्रेरणादायी पुस्तके, कादंबऱ्या आणि कवितासंग्रह अशा विविध प्रकारच्या पुस्तकांचा समावेश करण्यात आला आहे. या माध्यमातून विद्यार्थी, तरुण आणि मराठीप्रेमींना वाचनाची संधी उपलब्ध होणार असून, सीमाप्रश्न आणि संयुक्त महाराष्ट्र चळवळीचा इतिहास समजून घेण्यासाठीही मदत होणार आहे.
डिजिटल युगात वाचन संस्कृती रुजविण्याचा प्रयत्न
यावेळी महाराष्ट्र एकीकरण युवा समितीचे सरचिटणीस श्रीकांत कदम यांनी मनोगत व्यक्त केले. आजच्या डिजिटल युगात तरुणांमध्ये पुस्तकांविषयी आवड निर्माण व्हावी, वाचन संस्कृती रुजावी आणि ती अधिक व्यापक व्हावी, या उद्देशाने ग्रंथालयाची संकल्पना मांडण्यात आल्याचे त्यांनी सांगितले.
बेळगावसह सीमाभागात मराठी वाचन संस्कृती अधिक सक्षम करण्याबरोबरच सीमाप्रश्न आणि संयुक्त महाराष्ट्र चळवळीचा अभ्यास करण्यासाठी हे ग्रंथालय उपयुक्त ठरेल, असा विश्वास त्यांनी व्यक्त केला.
मराठी भाषा आणि अस्मिता बळकट करण्याचे ध्येय
युवा समितीचे अध्यक्ष अंकुश केसरकर यांनी मराठी भाषा आणि संस्कृतीच्या जतनासाठी वाचन, शिक्षण आणि ज्ञानाची भूमिका महत्त्वाची असल्याचे सांगितले. सीमाभागातील मराठी अस्मिता अधिक बळकट करण्यासाठी आणि नव्या पिढीला मराठी भाषा, साहित्य, विचार व संस्कारांशी जोडण्यासाठी समिती प्रयत्नशील असल्याचे त्यांनी स्पष्ट केले.
हे ग्रंथालय केवळ पुस्तकांचा संग्रह न राहता मराठी भाषा, साहित्य आणि विचारांची नाळ पुढील पिढीशी जोडणारे व्यासपीठ ठरेल, असा विश्वासही त्यांनी व्यक्त केला.
मराठीप्रेमींना ग्रंथालयाचा लाभ घेण्याचे आवाहन
‘सहकार्य समाजाचे, कर्तव्य युवा समितीचे’ हे ब्रीद घेऊन कार्यरत असलेल्या महाराष्ट्र एकीकरण युवा समितीच्या मराठी भाषा संवर्धनाच्या वाटचालीतील हे आणखी एक महत्त्वाचे पाऊल आहे. या विधायक उपक्रमासाठी सहकार्य केल्याबद्दल राज्य मराठी विकास संस्था, मुंबई यांचे विशेष आभार मानण्यात आले.
मराठीप्रेमी नागरिक, विद्यार्थी, तरुण आणि वाचनप्रेमींनी या ग्रंथालयाचा लाभ घ्यावा तसेच मराठी वाचन संस्कृतीच्या संवर्धनासाठी या उपक्रमाला सहकार्य करावे, असे आवाहन महाराष्ट्र एकीकरण युवा समितीच्या वतीने करण्यात आले.
ज्ञानाची समृद्धी, वाचनाची आवड आणि मराठी अस्मितेचे संवर्धन या उद्देशाने सुरू झालेले हे ग्रंथालय सीमाभागातील मराठी भाषा चळवळीला नवी दिशा देणारे ठरेल, अशी अपेक्षा व्यक्त होत आहे.
