बेळगाव, 19 जून : आंतरराष्ट्रीय योग दिन 2026 निमित्त द मराठा लाईट इन्फंट्री रेजिमेंटल सेंटर (MARATHA LIRC), बेळगाव यांच्या वतीने Army Public School येथे सामुदायिक योग सत्राचे आयोजन करण्यात आले. “योगा फॉर हेल्दी एजिंग” या संकल्पनेवर आधारित या कार्यक्रमातून सर्व वयोगटांतील नागरिकांच्या शारीरिक, मानसिक आणि भावनिक आरोग्यासाठी योगाचे महत्त्व अधोरेखित करण्यात आले.
या योग कार्यशाळेत सुमारे 800 जणांनी उत्स्फूर्त सहभाग नोंदविला. यामध्ये विद्यार्थी, शिक्षक, मुख्याध्यापक तसेच विविध क्षेत्रातील नागरिकांचा समावेश होता. मोठ्या संख्येने उपस्थित राहिलेल्या सहभागींच्या उत्साहातून निरोगी आणि संतुलित जीवनशैलीसाठी योगाविषयी वाढत असलेली जागरूकता स्पष्टपणे दिसून आली.
MARATHA LIRC च्या प्रशिक्षित योग प्रशिक्षकांनी विविध योगासने आणि प्राणायाम प्रकारांचे प्रात्यक्षिक सादर केले. तसेच निरोगी जीवन, तणाव व्यवस्थापन आणि सर्वांगीण आरोग्यासाठी योगाचे फायदे उपस्थितांना समजावून सांगितले. या सत्रामुळे सहभागींत एकात्मता, सकारात्मकता आणि सामूहिक आरोग्याची भावना अधिक दृढ झाली.
या उपक्रमाद्वारे MARATHA Light Infantry Regimental Centre ने आरोग्य, तंदुरुस्ती आणि सामाजिक सलोखा वाढविण्याच्या आपल्या बांधिलकीचा पुनरुच्चार केला. विद्यार्थी आणि शिक्षकांना एकाच व्यासपीठावर आणून योगाच्या माध्यमातून आरोग्यदायी जीवनाचा संदेश देण्यात आला.
“Together in Wellness, United in Spirit” या संदेशासह कार्यक्रमाची सांगता झाली. योगाच्या चिरंतन मूल्यांचा आणि सामूहिक कल्याणाच्या भावनेचा जागर करत हा आंतरराष्ट्रीय योग दिन उत्साहपूर्ण वातावरणात साजरा करण्यात आला.
