रंकुंडये: राष्ट्रीय पल्स पोलिओ लसीकरण अभियानांतर्गत किणये प्राथमिक आरोग्य केंद्राच्या (PHC) वतीने रंकुंडये गावात पोलिओ लसीकरण शिबिराचे यशस्वी आयोजन करण्यात आले. या मोहिमेदरम्यान अनेक बालकांना पोलिओचे दोन थेंब देऊन त्यांना पोलिओपासून संरक्षण मिळावे तसेच समाजाची रोगप्रतिकारक क्षमता अधिक बळकट व्हावी यासाठी प्रयत्न करण्यात आले.
यावेळी माजी महापौर विजय मोरे यांनी उपस्थित राहून पालकांना आपल्या प्रत्येक पात्र बालकाला पोलिओची लस देण्याचे आवाहन केले. तसेच ग्रामपंचायत सदस्य भरमा पाटील, निलेश रामगवाडे आणि अशोक कोरे यांनीही उपस्थित राहून लसीकरण मोहिमेला पाठिंबा दर्शविला.
किणये प्राथमिक आरोग्य केंद्रातील सर्व वैद्यकीय अधिकारी व कर्मचाऱ्यांनी या मोहिमेत सक्रिय सहभाग घेत लसीकरणाची प्रक्रिया सुरळीत आणि यशस्वीरीत्या पार पाडली. यावेळी आरोग्य विभागाच्या अधिकाऱ्यांनी भविष्यातील लसीकरण मोहिमांनाही पालकांनी उत्स्फूर्त प्रतिसाद देण्याचे आवाहन केले. प्रत्येक बालकापर्यंत पोलिओ प्रतिबंधक लस पोहोचवून “पोलिओमुक्त भारत” घडविण्यासाठी सर्वांनी सहकार्य करावे, असेही त्यांनी नमूद केले.
