ज्योतिर्लिंगाची पूजा-अर्चा, आरती आणि महाप्रसादाने परिसर भक्तिमय
बेळगाव : आधुनिक तंत्रज्ञानाच्या युगातही आपल्या पूर्वजांनी जपलेल्या धार्मिक आणि सांस्कृतिक परंपरांचा वारसा पुढे नेण्याचे काम चव्हाट गल्लीतील नागरिकांनी कायम ठेवले आहे. गेल्या अडीचशे वर्षांपासून सुरू असलेली श्रावण सोमवारची परंपरा यंदाही मोठ्या श्रद्धा आणि भक्तिभावाने पार पडली.
चव्हाट गल्लीतील श्री देवदादा सासनकाठी देवस्थान मंदिरात श्रावण महिन्याच्या पहिल्या सोमवारपासून पारंपरिक पूजाअर्चा व धार्मिक विधींना सुरुवात झाली. श्रावणातील तिसऱ्या सोमवारी श्री ज्योतिर्लिंगाच्या मूर्तीची विधिवत पूजा, आरती करण्यात आली. त्यानंतर महाप्रसादाचे पूजन करून भाविकांना प्रसादाचे वितरण करण्यात आले.
या धार्मिक सोहळ्यास चव्हाट गल्लीसह परिसरातील भाविक मोठ्या संख्येने उपस्थित होते. भाविकांनी श्री ज्योतिर्लिंगाचे दर्शन घेत महाप्रसादाचा लाभ घेतला. यामुळे संपूर्ण परिसरात दिवसभर भक्तिमय वातावरण निर्माण झाले होते.
यावेळी माजी आमदार अनिल बेनके यांनी चव्हाट गल्लीतील अडीचशे वर्षांच्या या परंपरेचे कौतुक केले. आधुनिक तंत्रज्ञान आणि कृत्रिम बुद्धिमत्तेच्या युगातही नागरिकांनी आपल्या पूर्वजांनी जपलेल्या धार्मिक परंपरा, संस्कृती आणि श्रद्धेचा वारसा निष्ठेने पुढे नेणे ही अभिमानाची बाब असल्याचे त्यांनी सांगितले. ज्येष्ठ नागरिक, महिला, युवक आणि भाविकांच्या सहभागामुळे हा सोहळा अधिक भक्तिमय झाल्याचेही त्यांनी नमूद केले.
सर्वप्रथम देवघरात आरती व पूजाविधी पार पडला. यावेळी मार्केट पोलीस स्थानकाचे अधिकारी कालीमिरची उपस्थित होते. त्यानंतर माजी आमदार अनिल बेनके आणि प्रताप मोहिते यांच्या उपस्थितीत महाप्रसाद वितरणास सुरुवात झाली.
या प्रसंगी श्री ज्योतिर्लिंग भक्त मंडळाचे कार्याध्यक्ष नागेंद्र नाईक, खजिनदार प्राचार्य आनंद आपटेकर, देवस्थानचे पुजारी लक्ष्मण किल्लेकर, स्वयंपाक सेवेचे ज्योतिबा किल्लेकर, उपखजिनदार परशुराम किल्लेकर, उपसचिव ज्योतिबा धामणेकर, तसेच श्रीनाथ पवार, पंकज किल्लेकर, गिरीश पाटील, कपिल धामणेकर, नरेश धामणेकर, यशोधन किल्लेकर, विश्वजीत हजबे, अनिकेत घोरपडे यांच्यासह मंडळाचे पदाधिकारी, भाविक व नागरिक उपस्थित होते.
अडीचशे वर्षांची ही समृद्ध धार्मिक परंपरा पुढील पिढ्यांपर्यंत पोहोचविण्याचा संकल्प चव्हाट गल्लीतील नागरिकांनी यानिमित्ताने कायम ठेवला. परंपरा आणि आधुनिकतेचा समन्वय साधत सांस्कृतिक वारसा जपण्याचा आदर्श या सोहळ्यातून पुन्हा एकदा पाहायला मिळाला.
