बेळगाव : कॅम्प परिसरातील कॅन्टोनमेंट मराठी मुलामुलींच्या शाळेत विद्यार्थिनींच्या स्वसंरक्षणासाठी आणि शारीरिक सक्षमीकरणासाठी लाठी प्रशिक्षण केंद्राचा शुभारंभ उत्साहपूर्ण वातावरणात करण्यात आला. भारतीय जनता पार्टीचे नेते तथा सकल मराठा समाजाचे संयोजक किरण जाधव यांच्या हस्ते या प्रशिक्षण केंद्राचे उद्घाटन करण्यात आले.
कार्यक्रमात विद्यार्थिनींना मार्गदर्शन करताना किरण जाधव यांनी स्वसंरक्षणाचे महत्त्व अधोरेखित केले. आजच्या बदलत्या सामाजिक परिस्थितीत मुलींनी केवळ शैक्षणिकदृष्ट्या नव्हे तर शारीरिक आणि मानसिकदृष्ट्याही सक्षम असणे आवश्यक असल्याचे त्यांनी सांगितले. प्रत्येक मुलीमध्ये आत्मविश्वास निर्माण होणे गरजेचे असून, संकटाच्या प्रसंगी स्वतःचे संरक्षण करण्याची क्षमता विकसित करण्यासाठी लाठी प्रशिक्षण उपयुक्त ठरणार असल्याचे त्यांनी नमूद केले.
छत्रपती शिवाजी महाराजांच्या जडणघडणीत मातोश्री जिजाऊंच्या संस्कारांची भूमिका महत्त्वाची होती. त्यांनी शिवरायांना लहानपणापासून शौर्य, धैर्य, स्वसंरक्षण आणि शस्त्रविद्येचे धडे दिले. त्याच प्रेरणेतून आजच्या विद्यार्थिनींनाही सक्षम आणि आत्मविश्वासू बनविण्याची आवश्यकता असल्याचे जाधव यांनी सांगितले. मुलींनी कोणत्याही परिस्थितीला न घाबरता धैर्याने सामोरे जावे आणि स्वतःच्या सुरक्षेची जबाबदारी घेण्यास सक्षम व्हावे, हा या उपक्रमामागील मुख्य उद्देश असल्याचे त्यांनी स्पष्ट केले.
“विद्यार्थिनींना केवळ पुस्तकी ज्ञान देणे पुरेसे नाही. त्यांना क्रीडा, शारीरिक तंदुरुस्ती, स्वसंरक्षण आणि व्यक्तिमत्त्व विकासाच्या संधी उपलब्ध करून देणे आवश्यक आहे. सक्षम, शिस्तप्रिय आणि आत्मविश्वासू विद्यार्थिनीच भविष्यात कुटुंब, समाज आणि राष्ट्राच्या प्रगतीत मोलाचे योगदान देऊ शकतात,” असेही ते म्हणाले.
यावेळी विद्यार्थ्यांच्या सर्वांगीण विकासासाठी आणखी एक महत्त्वपूर्ण उपक्रम जाहीर करण्यात आला. ऑक्टोबर महिन्यातील सुट्टीदरम्यान शाळेतील विद्यार्थ्यांना मोफत स्विमिंग प्रशिक्षण देण्यात येणार असल्याची घोषणा किरण जाधव यांनी केली. शिक्षणासोबतच विविध क्रीडा प्रकारांमध्ये विद्यार्थ्यांचा सहभाग वाढावा आणि त्यांच्यात शारीरिक तंदुरुस्ती विकसित व्हावी, हा या उपक्रमामागील उद्देश असल्याचे त्यांनी सांगितले.
या कार्यक्रमाला शाळेचे मुख्याध्यापक, शिक्षकवर्ग, कॅन्टोनमेंट बोर्ड सदस्य सुधीर तुपेकर, राजन जाधव, शिल्पा केकरे, प्रियांका कलघटकर, आरती पाटोळे, हनुमंत कागलकर, माधुरी माळी, दिनेश रावळकर यांच्यासह अनेक मान्यवर उपस्थित होते. तसेच विद्यार्थी आणि पालकांनीही मोठ्या संख्येने उपस्थित राहून या उपक्रमाचे स्वागत केले.
लाठी प्रशिक्षण केंद्राच्या शुभारंभामुळे विद्यार्थिनींना स्वसंरक्षणाचे प्रशिक्षण मिळण्याबरोबरच त्यांच्यात धैर्य, शिस्त, आत्मविश्वास आणि नेतृत्वगुण विकसित होण्यास मदत होणार आहे. या अभिनव उपक्रमाचे पालक, विद्यार्थी आणि उपस्थित मान्यवरांकडून कौतुक करण्यात आले.
