२ सुवर्ण, ३ रौप्य आणि २ कांस्य पदकांसह बेळगावच्या खेळाडूंची दमदार कामगिरी
बेळगाव : शिमोगा येथे आयोजित युवा दसरा राज्यस्तरीय शरीरसौष्ठव स्पर्धेत बेळगावच्या खेळाडूंनी उल्लेखनीय कामगिरी करत एकूण ७ पदकांची कमाई केली. यामध्ये २ सुवर्ण, ३ रौप्य आणि २ कांस्य पदकांचा समावेश आहे. या स्पर्धेत ८० किलो वजनी गटात सुवर्णपदक पटकावणाऱ्या प्रशांत खन्नूकर यांचा मध्यवर्ती सार्वजनिक नवरात्र-दसरा उत्सव महामंडळाच्या वतीने विशेष सत्कार करण्यात आला.
प्रशांत खन्नूकर यांनी आपल्या मेहनतीच्या, जिद्दीच्या आणि कठोर सरावाच्या जोरावर राज्यस्तरीय स्पर्धेत सुवर्णपदक मिळविले. त्यांच्या या यशाबद्दल येळूर गावचे ज्येष्ठ नेते वामनराव पाटील, पवन जवेकर आणि महामंडळाचे अध्यक्ष प्राचार्य आनंद आपटेकर यांच्या हस्ते त्यांचा सत्कार करण्यात आला. उपस्थित मान्यवरांनी त्यांचे अभिनंदन करून पुढील क्रीडा वाटचालीस शुभेच्छा दिल्या.
शरीरसौष्ठव या खेळात सातत्यपूर्ण व्यायाम, शिस्त, योग्य आहार आणि कठोर परिश्रम यांना विशेष महत्त्व आहे. प्रशांत खन्नूकर यांनी या गुणांच्या बळावर मिळविलेल्या यशामुळे बेळगावच्या क्रीडा क्षेत्राच्या नावलौकिकात भर पडली आहे. त्यांच्या कामगिरीमुळे शहरातील नवोदित शरीरसौष्ठवपटूंनाही प्रेरणा मिळणार आहे.
यावेळी महामंडळाचे उपाध्यक्ष संदीप कामुले, जनसंपर्कप्रमुख विकास कलघटगी, दिगंबर पवार, ज्योतिबा नाईक, विश्वजीत हसबे, श्रीनाथ पवार, भाऊराव मोहिते, भास्कर चव्हाण, परिश्रम किल्लेकर आणि प्रशांत मोहिते उपस्थित होते.
याप्रसंगी उपाध्यक्ष संदीप कामुले यांनी प्रशांत खन्नूकर यांच्या कामगिरीचे कौतुक केले. राज्यस्तरीय स्पर्धेत त्यांनी मिळविलेले यश बेळगावसाठी अभिमानास्पद असल्याचे सांगत, आगामी स्पर्धांमध्ये त्यांच्या क्रीडा वाटचालीसाठी महामंडळाच्या वतीने शक्य ते सर्व सहकार्य करण्यात येईल, असे आश्वासन त्यांनी दिले.
प्रशांत खन्नूकर यांच्या यशाबद्दल क्रीडा क्षेत्रातून त्यांचे अभिनंदन होत असून, आगामी स्पर्धांमध्येही त्यांनी अशीच कामगिरी करून बेळगावचे नाव राज्य आणि राष्ट्रीय स्तरावर उंचवावे, अशा शुभेच्छा व्यक्त करण्यात येत आहेत.
