बेळगाव : जायंट्स ग्रुप ऑफ बेळगाव मेनतर्फे गोवा वेस सर्कल येथील पोहण्याच्या तलावात लहान मुलांसाठी जलतरण स्पर्धेचे आयोजन करण्यात आले. या स्पर्धेत तब्बल ३५ मुला-मुलींनी उत्स्फूर्त सहभाग घेतला.
लहान मुलांमध्ये पोहण्याची आवड निर्माण करणे, त्यांच्यात निरोगी स्पर्धेची भावना रुजवणे आणि पोहण्याचे आवश्यक कौशल्य विकसित करणे, हा या उपक्रमाचा मुख्य उद्देश होता. स्पर्धेमुळे मुलांना आपल्या कामगिरीचे मूल्यमापन करण्याबरोबरच चुका ओळखून त्यात सुधारणा करण्याची संधी मिळाली.
प्रथम, द्वितीय आणि तृतीय क्रमांक देण्यामागे केवळ स्पर्धेचा निकाल हा उद्देश नसून मुलांना शिकण्याची आणि स्वतःमध्ये सुधारणा करण्याची संधी मिळावी, हा हेतू होता. दुसऱ्या क्रमांकावर आलेल्या स्पर्धकाला प्रथम क्रमांक मिळवण्यासाठी कोणत्या बाबींमध्ये सुधारणा करावी लागेल, तर तिसऱ्या क्रमांकावरील स्पर्धकाला आपल्या तंत्राचे कुठे मूल्यमापन करावे लागेल, याची जाणीव या माध्यमातून होण्यास मदत झाली.
स्पर्धेतील विजेत्या स्पर्धकांना तीन वेगवेगळ्या गटांमध्ये सुवर्ण, रौप्य आणि कांस्य पदकांनी सन्मानित करण्यात आले. सर्व ३५ सहभागींसाठी ही स्पर्धा उत्साहवर्धक आणि शिकण्याचा अनुभव देणारी ठरली.
कार्यक्रमाला जायंट्स मेनचे अध्यक्ष लक्ष्मण शिंदे, सचिव विश्वास पवार, फेडरेशन ऑफिसर सुनील मुतगेकर आणि उपाध्यक्ष अरुण काळे उपस्थित होते. यावेळी जलतरण प्रशिक्षक तसेच सहभागी मुलांचे पालकही उपस्थित होते.
सर्वांच्या सहकार्याने आणि उत्साहपूर्ण सहभागामुळे जायंट्स ग्रुप ऑफ बेळगाव मेनतर्फे आयोजित ही जलतरण स्पर्धा उत्साहात आणि यशस्वीरीत्या पार पडली.
