बेळगाव : शहरातील मार्केट पोलीस ठाण्याच्या हद्दीत सीसीबी (CCB) पथकाने अमली पदार्थांविरोधात मोठी कारवाई करत सुमारे ₹९ लाख किमतीचे हेरॉईन जप्त केले असून एका संशयिताला अटक केली आहे.
३० जून २०२६ रोजी मिळालेल्या गुप्त माहितीनुसार, राघवेंद्र गोपाळ मुकरनाळ (वय ३६, रा. गंगाधर नगर, शिंदोळी, बेळगाव) हा स्वतःच्या फायद्यासाठी हेरॉईनची वाहतूक करत असल्याची माहिती सीसीबी पथकाला मिळाली होती. त्यानुसार केएसआरटीसी बसस्थानक परिसरातील इंदिरा कॅन्टीनजवळ सापळा रचून संशयिताला ताब्यात घेण्यात आले.
झडतीदरम्यान आरोपीकडून ४५.१८ ग्रॅम हेरॉईन (किंमत ₹९ लाख) तसेच एक मोबाईल फोन असा एकूण ₹९,००,५०० किमतीचा मुद्देमाल जप्त करण्यात आला.
या प्रकरणी मार्केट पोलीस ठाण्यात गुन्हा क्रमांक १७६/२०२६ नोंद करण्यात आला असून एनडीपीएस कायद्याच्या कलम 21(b) आणि 8(c) अंतर्गत गुन्हा दाखल करून पुढील तपास सुरू आहे.
ही कारवाई सीसीबीचे पोलीस निरीक्षक मंजुनाथ नायक यांच्या मार्गदर्शनाखाली पीएसआय मंजुनाथ भजंत्री व त्यांच्या पथकाने केली. या उल्लेखनीय कारवाईबद्दल पोलीस आयुक्त आणि उपायुक्तांनी (DCP) संबंधित अधिकारी व कर्मचाऱ्यांचे कौतुक केले आहे.
