बेळगावातील गोवावेस परिसरातील मराठा मंदिर येथे आयोजित सभेत केलेल्या भाषणावरून एमईएस युवा संघटनेचे अध्यक्ष शुभम शळके यांच्याविरुद्ध टिळकवाडी पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, 24 जून रोजी सिद्धप्पा सोमनाथ होसमनी (वय 45) यांनी तक्रार दाखल केली. तक्रारीत म्हटले आहे की, 16 जून रोजी झालेल्या सभेत शुभम शळके यांनी मराठी भाषेच्या फलकांना प्राधान्य देण्याचे आवाहन करत, मराठीला स्थान न देणाऱ्या व्यापाऱ्यांकडून खरेदी करू नये, असे वक्तव्य केले होते.
तक्रारदाराच्या मते, हे भाषण प्रक्षोभक स्वरूपाचे असून सामाजिक सलोखा बिघडवण्याची आणि शहरात तणाव निर्माण होण्याची शक्यता आहे. तसेच संबंधित भाषणाचे काही भाग सोशल मीडियावर, विशेषतः इन्स्टाग्रामवर प्रसारित करण्यात आल्याचा आरोप करण्यात आला आहे.
या प्रकरणी टिळकवाडी पोलिस ठाण्यात गुन्हा दाखल करण्यात आला असून पोलिसांनी पुढील तपास सुरू केला आहे.
