बेळगाव येथील श्री ज्योतिर्लिंग देवस्थान दादा अष्टेकर भक्त मंडळ, नार्वेकर गल्ली यांच्या वतीने सालाबादप्रमाणे यंदाही भाविकांची पायी दिंडी महिपाळगड येथील वैद्यनाथ देवाच्या दर्शनासाठी रवाना झाली. शनिवार दिनांक २ मे २०२६ रोजी सायंकाळी ५ वाजता बैलगाड्यांसह भक्तांनी प्रस्थान केले.
ही दिंडी रात्री सुमारे १० वाजण्याच्या सुमारास वैद्यनाथ डोंगरावर पोहोचणार असून तेथे मुक्काम करण्यात येणार आहे. रविवार दिनांक ३ मे रोजी पहाटे ५ वाजता वैद्यनाथ देवाला दुग्धाभिषेक करण्यात येणार आहे. तसेच देवाला दवणा व गुलाल अर्पण करून खीर-भात व पुरणपोळीचा नैवेद्य दाखवण्यात येईल. त्यानंतर महाप्रसादाचे वाटप करण्यात येणार आहे.
दर्शन व धार्मिक विधी पूर्ण झाल्यानंतर भक्तगण संध्याकाळी परतीच्या प्रवासाला सुरुवात करणार आहेत. चैत्र यात्रेनंतर वैद्यनाथ देवाला दवणा अर्पण करण्याची ही पूर्वापार चालत आलेली परंपरा असून भक्तगण ती आजही भक्तिभावाने जपत आहेत.
