🚨 ब्रेकिंग न्यूज 🚨शिवम असोसिएट्सच्या कार्यालयांवर प्रशासनाचा छापा; आर्थिक व्यवहारांची चौकशी सुरू

बेळगाव : शहरातील शिव बसव नगर परिसरातील शिवम असोसिएट्स संस्थेचे मालक शिवानंद नीलण्णावर यांच्या दोन कार्यालयांवर गुरुवारी जिल्हा प्रशासन व सहकार विभागाच्या अधिकाऱ्यांनी संयुक्त कारवाई करत महत्त्वाच्या कागदपत्रांची तपासणी केली. या कारवाईमुळे शहरात मोठी खळबळ उडाली असून विविध चर्चांना उधाण आले आहे.

उपविभागीय अधिकारी श्रमण नायक यांच्या नेतृत्वाखाली सहकार विभागाच्या पथकाने कार्यालयात धाड टाकून आर्थिक व्यवहार, गुंतवणूक नोंदी तसेच नागरिकांकडून जमा करण्यात आलेल्या पैशांशी संबंधित कागदपत्रांची पडताळणी केली. काही महत्त्वाची कागदपत्रे अधिकाऱ्यांनी ताब्यात घेतल्याची माहिती समोर येत आहे.

शिवम असोसिएट्स संस्थेवर माजी सैनिकांसह सर्वसामान्य नागरिकांना जादा व्याजदराचे आमिष दाखवून मोठ्या प्रमाणात निधी जमा केल्याचा आरोप आहे. राज्यातील विविध भागांतील हजारो गुंतवणूकदारांनी कोट्यवधी रुपयांची गुंतवणूक केल्याची शक्यता व्यक्त होत असून, या निधीच्या गैरवापराबाबतही चौकशी सुरू असल्याची माहिती सूत्रांकडून मिळत आहे.

दरम्यान, शिवानंद नीलण्णावर यांची काही भाषणे आणि विधाने अलीकडे सोशल मीडियावर मोठ्या प्रमाणात व्हायरल झाली होती. “आमच्याकडे 15 हजार बंदुका आहेत”, “मोठे साम्राज्य उभे केले आहे”, “मी कुणालाही घाबरत नाही” अशा विधानांमुळे वाद निर्माण झाला होता. तसेच 2028 च्या निवडणुकीत 224 जागा जिंकून मुख्यमंत्री होणार असल्याचा दावाही त्यांनी केला होता.

याच पार्श्वभूमीवर 17 मे रोजी “स्वच्छ बेळगाव” नावाने मोठा कार्यक्रम आयोजित करण्याची तयारी सुरू होती. सुमारे 20 हजार लोकांना एकत्र आणण्याचा दावा करण्यात आला होता. मात्र, कार्यक्रमासाठीची परवानगी, शहरातील बॅनर्स आणि सार्वजनिक सभांबाबत प्रशासनाने आधीच कठोर भूमिका घेतली होती.

आता कार्यालयांवरील या कारवाईमुळे प्रकरणाला नवे वळण मिळाले असून, अधिकाऱ्यांच्या तपासानंतर आणखी धक्कादायक माहिती समोर येण्याची शक्यता व्यक्त केली जात आहे.

Related Posts

कारच्या पैशाच्या वादातून युवकाचा खून; बेळगाव ग्रामीण पोलिसांकडून 5 आरोपी अटकेत

जायंटस् गृप ऑफ बेळगांव मेनचा अनोखा उपक्रम; समाजसेवकांचा सन्मान

Leave a Reply Cancel reply