बेळगाव : शहरातील कायदा-सुव्यवस्थेच्या प्रश्नावर चिंता व्यक्त करणारी धक्कादायक घटना उघडकीस आली आहे. शनिवारी पहाटे 1 ते 2 वाजण्याच्या सुमारास मांडोळी रोड परिसरात अज्ञात व्यक्तींनी एका वकिलाच्या घरावर गोळीबार केल्याची घटना घडली.
ही घराणे अॅडव्होकेट पूजा काकतकर यांचे असून त्या गेल्या 18 वर्षांपासून वकिली व्यवसायात कार्यरत आहेत. मिळालेल्या माहितीनुसार, अज्ञात हल्लेखोरांनी घराच्या पहिल्या मजल्याला लक्ष्य केले.
घटनेच्या वेळी पूजा काकतकर यांची मुलगी संस्कृती ही पहिल्या मजल्यावरील खोलीत परीक्षेच्या अभ्यासात व्यस्त होती. याच वेळी एक गोळी खिडकीच्या काचेला लागून आत आली; मात्र सुदैवाने ती थोडक्यात बचावली आणि कोणतीही दुखापत झाली नाही.
घटनेनंतर बेळगाव ग्रामीण पोलिस आणि ‘सीन ऑफ क्राईम’ (SoC) पथकाने घटनास्थळी भेट देऊन पाहणी केली. खिडकीवरील गोळीचे चिन्ह आणि घटनास्थळावर सापडलेले तुकडे तपासासाठी फॉरेन्सिक सायन्स लॅब (FSL) कडे पाठवण्यात आले आहेत.
या हल्ल्यामागील नेमके कारण अद्याप स्पष्ट झाले नसून, व्यावसायिक स्पर्धा किंवा वैयक्तिक वाद यांचा तपास पोलिस करत आहेत. खबरदारीचा उपाय म्हणून कुटुंबाला पोलीस सुरक्षा देण्यात आली आहे.
या प्रकरणी बेळगाव ग्रामीण पोलिस ठाण्यात गुन्हा नोंदवण्यात आला असून पुढील तपास सुरू आहे. शस्त्राचा प्रकार आणि इतर तपशील FSL अहवालानंतर स्पष्ट होण्याची शक्यता आहे.
