बेळगाव : क्विक हील फाउंडेशन, पुणे यांच्या ‘सायबर शिक्षा फॉर सायबर सुरक्षा’ या राष्ट्रीय उपक्रमांतर्गत डीएमएस कॉम्प्युटर ॲप्लिकेशन्स महाविद्यालय, बेळगाव येथील सायबर वॉरियर्सनी वाघवडे येथे विद्यार्थ्यांसाठी सायबर सुरक्षा जनजागृती कार्यक्रमाचे आयोजन केले.
या उपक्रमादरम्यान महाविद्यालयाचे माजी विद्यार्थी सुदर्शन बाळू मुसळे आणि तेजस्विनी रांगणेकर यांनी मराठी शाळेतील विद्यार्थ्यांना सायबर गुन्हे आणि डिजिटल सुरक्षिततेबाबत मार्गदर्शन केले. सायबर गुन्ह्यांविषयी पुरेशी माहिती नसलेल्या विद्यार्थ्यांना त्यांनी सोप्या उदाहरणांच्या माध्यमातून सामाजिक माध्यमांवरील फसवणूक, ओटीपी फसवणूक, फिशिंग, सुरक्षित पासवर्ड आणि डिजिटल सुरक्षेच्या विविध उपाययोजनांची माहिती दिली.
सायबर गुन्ह्यांपासून स्वतःचे संरक्षण कसे करावे, ऑनलाइन व्यवहार करताना कोणती काळजी घ्यावी आणि जबाबदार डिजिटल नागरिक म्हणून कसे वागावे, याबाबत विद्यार्थ्यांमध्ये जागरूकता निर्माण करण्यात आली.
या कार्यक्रमाला प्राथमिक शाळेतील शिक्षक, प्राध्यापक आणि कर्मचारीवर्ग उपस्थित होता. स्थानिक समुदायाकडूनही या जनजागृती उपक्रमाचे कौतुक करण्यात आले.
तरुण पिढी तसेच सर्वसामान्य नागरिकांमध्ये सायबर सुरक्षेबाबत जागरूकता निर्माण करण्याच्या दृष्टीने डीएमएस महाविद्यालयाच्या सायबर वॉरियर्सचा हा उपक्रम महत्त्वपूर्ण ठरला.
