बेळगाव : भारतेश एज्युकेशन ट्रस्टच्या चार संस्थांच्या वतीने शांताई विद्या आधार या संस्थेला सुमारे ५ टन रद्दी देण्यात आली. जुन्या वर्तमानपत्रांसह पुस्तके आणि इतर पुनर्वापरयोग्य कागदी साहित्याचा यात समावेश आहे.
या उपक्रमात भारतेश कॉलेज ऑफ कॉम्प्युटर अॅप्लिकेशन, मोतीचंद लेंगडे भारतेश पॉलिटेक्निक कॉलेज, अनुवर्तिक मिरजी भारतेश इन्स्टिट्यूट ऑफ टेक्नॉलॉजी आणि BET’s ग्लोबल बिझनेस स्कूल यांनी सहभाग घेतला.
शांताई विद्या आधारच्या माध्यमातून जमा होणारी रद्दी विकली जाते. त्यातून मिळणारा निधी बेळगावमधील शाळा व महाविद्यालयांमध्ये शिक्षण घेणाऱ्या गरजू व गुणवंत विद्यार्थ्यांच्या शैक्षणिक खर्चासाठी वापरण्यात येतो.
यावेळी शांताई विद्या आधारचे संचालक मंडळ सदस्य अॅलन विजय मोरे यांनी भारतेश एज्युकेशन ट्रस्टच्या व्यवस्थापन, शिक्षक-कर्मचारी आणि विद्यार्थ्यांचे आभार मानले. पुनर्वापरयोग्य साहित्याच्या माध्यमातून गरजू विद्यार्थ्यांच्या शिक्षणासाठी मदत होत असल्याचे त्यांनी सांगितले.
शिक्षणाच्या कार्याला हातभार लावणाऱ्या या उपक्रमासाठी शांताई विद्या आधारच्या वतीने भारतेश एज्युकेशन ट्रस्ट परिवाराचे आभार व्यक्त करण्यात आले.
