बेळगाव : सैन्याच्या कार्यक्षमतेत लक्षणीय वाढ करत शनिवारी बेळगाव येथील मराठा लाईट इन्फंट्री रेजिमेंटल सेंटरमध्ये १६व्या ‘भैरव’ बटालियनची औपचारिक स्थापना करण्यात आली.
या बटालियनचे उद्घाटन एका भव्य समारंभात करण्यात आले. या वेळी मराठा लाईट इन्फंट्री रेजिमेंटल सेंटरचे कमांडंट ब्रिगेडियर जॉयदीप मुखर्जी यांनी नव्याने स्थापन झालेल्या युनिटच्या कमांडिंग ऑफिसरकडे बटालियनचा ध्वज सुपूर्द केला.
‘भैरव’ बटालियन, ज्याला ‘भैरव लाईट कमांडो बटालियन’ असेही संबोधले जाते, ही भारतीय सेनेच्या नव्या धोरणाचा एक भाग आहे. आधुनिक युद्धातील गरजा लक्षात घेऊन पारंपरिक पायदळ आणि स्पेशल फोर्सेस यांच्या मधील दुवा म्हणून या लहान, गतिमान आणि उच्च प्रशिक्षण घेतलेल्या युनिट्सची उभारणी करण्यात येत आहे.
प्रत्येक भैरव बटालियनमध्ये सुमारे २५० विशेष प्रशिक्षित जवानांचा समावेश असतो. या युनिट्सना जलद प्रतिसाद, गुप्त माहिती संकलन, अचानक हल्ले (surprise raids) आणि सीमावर्ती संवेदनशील भागात उच्च तीव्रतेच्या मोहिमा राबविण्यासाठी तयार करण्यात आले आहे. यामुळे स्पेशल फोर्सेसवरील ताण कमी होण्यासही मदत होणार आहे.
लष्करी अधिकाऱ्यांनी सांगितले की, बदलत्या सुरक्षा आव्हानांच्या पार्श्वभूमीवर हलक्या, वेगवान आणि चपळ पायदळ युनिट्सचे महत्त्व मोठ्या प्रमाणात वाढले आहे. विविध भौगोलिक परिस्थितींमध्ये तातडीने तैनात होऊन प्रभावी कारवाई करण्याची क्षमता या बटालियनमध्ये असेल.
या समारंभातून भारतीय सेनेची आधुनिकीकरण, क्षमता वृद्धी आणि उच्च स्तरावरील सज्जता राखण्याची बांधिलकी अधोरेखित झाली.
बेळगाव येथील मराठा लाईट इन्फंट्री रेजिमेंटल सेंटर हे भारतीय सेनेतील एक प्रतिष्ठित आणि ऐतिहासिक प्रशिक्षण केंद्र असून, देशासाठी सज्ज आणि सक्षम सैनिक घडविण्यात या केंद्राची महत्त्वपूर्ण भूमिका कायम राहिली आहे.
