RE-NEET UG 2026 परीक्षा रविवारी; बेळगाव जिल्ह्यात 28 परीक्षा केंद्रांवर कडक बंदोबस्त
बेळगाव, 18 जून : राष्ट्रीय पात्रता व प्रवेश परीक्षा (NEET-UG) 2026 च्या पुनर्परीक्षेचे (RE-NEET UG 2026) आयोजन रविवार, 21 जून रोजी दुपारी 2 ते सायंकाळी 5 या वेळेत करण्यात आले आहे. सर्वोच्च न्यायालयाच्या निर्देशानुसार आणि राष्ट्रीय परीक्षा संस्थेच्या (NTA) मार्गदर्शक सूचनांनुसार ही परीक्षा घेण्यात येणार असून बेळगाव जिल्हा प्रशासनाने परीक्षेच्या सुरळीत आयोजनासाठी व्यापक तयारी केली आहे.
जिल्हाधिकारी मोहम्मद रोशन यांनी जारी केलेल्या आदेशानुसार, परीक्षा केंद्रांमध्ये कोणताही गैरप्रकार होऊ नये यासाठी कडक सुरक्षा व्यवस्था लागू करण्यात आली आहे. बेळगाव शहरातील 28 परीक्षा केंद्रांवर ही परीक्षा होणार असून परीक्षार्थी, पालक आणि संबंधित यंत्रणांना आवश्यक सूचना देण्यात आल्या आहेत.
परीक्षेच्या दिवशी सर्व उमेदवारांनी प्रवेशपत्र आणि वैध ओळखपत्र सोबत बाळगणे बंधनकारक असणार आहे. परीक्षा सुरू होण्यापूर्वी उमेदवारांची सखोल तपासणी करण्यात येणार असून मोबाईल फोन, ब्लूटूथ उपकरणे, स्मार्ट वॉच, कॅल्क्युलेटर, इलेक्ट्रॉनिक गॅझेट्स तसेच इतर प्रतिबंधित वस्तूंना परीक्षा केंद्रात नेण्यास मनाई करण्यात आली आहे.
जिल्हा प्रशासनाने प्रत्येक परीक्षा केंद्रासाठी केंद्राध्यक्ष, पर्यवेक्षक आणि सुरक्षा अधिकाऱ्यांची नियुक्ती केली आहे. पोलीस विभाग, शिक्षण विभाग, आरोग्य विभाग आणि महसूल विभाग यांच्यात समन्वय ठेवून परीक्षा प्रक्रियेवर विशेष लक्ष ठेवण्यात येणार आहे. परीक्षा काळात कायदा व सुव्यवस्था अबाधित राखण्यासाठी अतिरिक्त पोलीस बंदोबस्त तैनात करण्यात येणार आहे.
परीक्षार्थींना कोणतीही गैरसोय होऊ नये यासाठी वाहतूक व्यवस्था, पिण्याच्या पाण्याची सुविधा, वैद्यकीय मदत आणि आपत्कालीन सेवा उपलब्ध ठेवण्याचे निर्देशही देण्यात आले आहेत. उमेदवारांनी परीक्षा केंद्रावर किमान दोन तास आधी उपस्थित राहावे, असे आवाहन प्रशासनाने केले आहे.
बेळगावमधील संगोळी रायण्णा फर्स्ट ग्रेड कॉन्स्टिट्यूएंट कॉलेज, गव्हर्नमेंट पीयू कॉलेज वडगाव, गव्हर्नमेंट पॉलिटेक्निक, केएलई संस्थेची विविध महाविद्यालये, मराठा मंडळ पीयू कॉलेज, केंद्रीय विद्यालय, राणी पार्वती देवी महाविद्यालय, व्हीटीयू मच्छे, गोमटेश पीयू कॉलेज, राणी चन्नम्मा विद्यापीठ, इस्लामिया कॅम्प पीयू कॉलेज, सरकारी सरदार्स पीयू कॉलेज, केएलई जीए कॉम्पोझिट पीयू कॉलेज, सेंट मेरीज हायस्कूल, वनिता विद्यालय आणि इतर शैक्षणिक संस्थांमध्ये परीक्षा केंद्रांची व्यवस्था करण्यात आली आहे.
दरम्यान, जिल्हाधिकारी कार्यालयाने भारतीय नागरिक सुरक्षा संहिता (BNSS) 2023 च्या कलम 163 अंतर्गत परीक्षा केंद्रांच्या परिसरात निर्बंध लागू केले आहेत. परीक्षा केंद्रांच्या 200 मीटर परिसरात अनधिकृत व्यक्तींची गर्दी, घोषणाबाजी, ध्वनीक्षेपकांचा वापर तसेच परीक्षा प्रक्रियेत अडथळा आणणाऱ्या कोणत्याही प्रकारच्या हालचालींवर बंदी घालण्यात आली आहे.
जिल्हा प्रशासनाने परीक्षार्थी, पालक आणि नागरिकांना सहकार्य करण्याचे आवाहन करत परीक्षा शांततेत, पारदर्शकपणे आणि कोणत्याही गैरप्रकारांशिवाय पार पाडण्यासाठी सर्वांनी जबाबदारीने वागावे, असे म्हटले आहे.
