बेळगाव : आई-वडिलांचे छत्र हरपलेल्या आणि अत्यंत हलाखीच्या परिस्थितीत जीवन जगणाऱ्या संभव उमेश लोहार या विद्यार्थ्याला जायंट्स ग्रुप ऑफ बेळगाव मेनच्या वतीने ५ हजार रुपयांची आर्थिक मदत देण्यात आली.
संभव उमेश लोहार हा हिंडलगा येथील हिंडलगा हायस्कूलमध्ये इयत्ता आठवीमध्ये शिक्षण घेत आहे. त्याच्या आई-वडिलांचे निधन झाल्यामुळे त्याचे मातृ-पितृछत्र हरपले आहे. सध्या तो आपल्या आजीकडे राहत असून, आजीला दरमहा मिळणाऱ्या अवघ्या ८०० रुपयांच्या पेन्शनवर दोघांचा उदरनिर्वाह सुरू आहे. अत्यंत कठीण आर्थिक परिस्थितीत त्यांचा संसार सुरू आहे.
संभवच्या शिक्षणात खंड पडू नये, यासाठी शाळेतील शिक्षक आणि शिक्षिका पुढाकार घेत आहेत. त्याच्या शाळेची फी, कपडे तसेच शैक्षणिक गरजांची व्यवस्था शिक्षकवर्गाकडून केली जात आहे. या विद्यार्थ्याची परिस्थिती जायंट्स ग्रुप ऑफ बेळगाव मेनच्या निदर्शनास आल्यानंतर ग्रुपने मदतीचा हात पुढे केला.
जायंट्स ग्रुप ऑफ बेळगाव मेनचे अध्यक्ष लक्ष्मण शिंदे यांच्या हस्ते संभवला ५ हजार रुपयांची आर्थिक मदत देण्यात आली. ही मदत शाळेच्या मुख्याध्यापिका पाटील मॅडम यांच्याकडे सुपूर्द करण्यात आली.
यावेळी ग्रुपचे उपाध्यक्ष अरुण काळे, मधु बेळगांवकर, बीओडी सदस्य आकाश लाटूकर, जयवंत पाटील, राहुल बेलवलकर, वाय. एन. पाटील, परिसरातील समाजसेवक प्रकाश बेळगुंदकर, मुख्याध्यापिका पाटील मॅडम तसेच सहशिक्षिका उपस्थित होत्या.
संभवच्या शिक्षणासाठी आणि त्याच्या कठीण परिस्थितीत मदतीचा हात पुढे केल्याबद्दल शाळेच्या मुख्याध्यापिका व शिक्षकवर्गाने जायंट्स ग्रुप ऑफ बेळगाव मेनचे आभार मानले. तसेच ग्रुपने केलेल्या या सामाजिक कार्याचे उपस्थितांनी कौतुक करून गौरवोद्गार काढले.
अत्यंत प्रतिकूल परिस्थितीतही एका विद्यार्थ्याचे शिक्षण सुरू राहावे, त्याच्या भविष्याला आधार मिळावा, या उदात्त हेतूने जायंट्स ग्रुप ऑफ बेळगाव मेनने केलेली ही मदत समाजापुढे माणुसकीचा सुंदर आदर्श निर्माण करणारी ठरली आहे.
