खासदार जगदीश शेट्टर यांच्या उपस्थितीत कॅन्टोन्मेंट बोर्डाचा उपक्रम; स्वच्छता, कचरा व्यवस्थापन आणि पर्यावरण संवर्धनाचा संदेश
बेळगाव : प्रतिनिधी
स्वच्छता, कचऱ्याचे योग्य व्यवस्थापन, घनकचरा व्यवस्थापन नियम २०२६ बाबत जनजागृती आणि नागरिकांचा सक्रिय सहभाग वाढविण्याच्या उद्देशाने बेळगाव कॅन्टोन्मेंट बोर्डातर्फे स्वच्छता ही सेवा (SHS) २०२६ अभियानांतर्गत वेंगुर्ला रोडवरील गांधी सर्कल येथे ‘एक दिन, एक घंटा, एक साथ’ या संकल्पनेतून स्वच्छता श्रमदानाचे आयोजन करण्यात आले. या उपक्रमात सुमारे १ हजार ते १२०० नागरिकांनी उत्स्फूर्त सहभाग घेत मानवसाखळी तयार करून स्वच्छतेचा संदेश दिला.
या कार्यक्रमाला बेळगावचे खासदार जगदीश शेट्टर प्रमुख पाहुणे म्हणून उपस्थित होते. माजी आमदार अनिल बेनके, माजी आमदार महांतेश कवटगीमठ, माजी विधानपरिषद सदस्य संजय पाटील, स्थानिक राजकीय नेते, प्रभाग सदस्य तसेच कॅन्टोन्मेंट बोर्डाचे माजी लोकप्रतिनिधी उपस्थित होते.
भारतीय वैद्यकीय संघटना, विविध स्वयंसेवी संस्था, बँका, बचत गट, सेवाभावी संस्था, शाळांमधील विद्यार्थी व शिक्षक, कॅन्टोन्मेंट बोर्डाचे अधिकारी-कर्मचारी, प्रसारमाध्यमांचे प्रतिनिधी आणि नागरिकांनी या उपक्रमात सहभाग घेतला. कॅन्टोन्मेंट बोर्डाचे मुख्य कार्यकारी अधिकारी मंचलवार सुदाम हरिविजय यांनी खासदारांसह सर्व मान्यवर आणि सहभागींचे स्वागत केले.
कार्यक्रमाच्या प्रारंभी खासदार जगदीश शेट्टर यांनी स्वच्छतेचा संदेश देत सार्वजनिक स्वच्छता राखणे ही प्रत्येक नागरिकाची सामूहिक जबाबदारी असल्याचे सांगितले. त्यानंतर कॅन्टोन्मेंट बोर्डाच्या शाळांमधील विद्यार्थ्यांनी पथनाट्य सादर करून स्वच्छता, कचऱ्याची योग्य विल्हेवाट आणि कचऱ्याचे स्रोतावरच वर्गीकरण करण्याचे महत्त्व पटवून दिले.
यावेळी विद्यार्थ्यांनी स्वच्छता, कचरा वर्गीकरण, पर्यावरण संरक्षण, जबाबदार कचरा व्यवस्थापन, स्वच्छता ही सेवा २०२६ आणि घनकचरा व्यवस्थापन नियम २०२६ यासंबंधी संदेश देणारे फलक तयार करून प्रदर्शित केले होते.
कार्यक्रमस्थळी स्वच्छता ही सेवा २०२६ आणि घनकचरा व्यवस्थापन नियम २०२६ याबाबत माहिती देणारा आकर्षक सेल्फी पॉइंट उभारण्यात आला होता. या ठिकाणी विद्यार्थी, अधिकारी, मान्यवर आणि नागरिकांनी उत्साहाने छायाचित्रे काढली. सोशल मीडियाच्या माध्यमातून स्वच्छतेचा संदेश अधिकाधिक नागरिकांपर्यंत पोहोचविण्याचे आवाहन करण्यात आले.
स्वच्छता कर्मचाऱ्यांच्या योगदानाची दखल घेत विद्यार्थ्यांनी सफाई मित्रांसाठी विशेष कौतुक संदेश तयार करून प्रदर्शित केले. कॅन्टोन्मेंट परिसर स्वच्छ आणि आरोग्यदायी ठेवण्यासाठी दररोज मेहनत घेणाऱ्या सफाई मित्रांच्या कार्याचा यावेळी गौरव करण्यात आला.
यानंतर खासदार जगदीश शेट्टर यांच्या हस्ते वृक्षारोपण करण्यात आले. पर्यावरण संवर्धन आणि शाश्वत विकासाचा संदेश देणाऱ्या या उपक्रमानंतर सुमारे १ हजार ते १२०० विद्यार्थी, लोकप्रतिनिधी, अधिकारी-कर्मचारी, स्वयंसेवी संस्थांचे प्रतिनिधी, शिक्षक आणि नागरिकांनी एकत्र येत भव्य मानवसाखळी तयार केली.
या मानवसाखळीच्या माध्यमातून स्वच्छता, कचऱ्याचे स्रोतावरच वर्गीकरण, जबाबदार कचरा व्यवस्थापन आणि नागरिकांचा सक्रिय सहभाग याबाबत जनजागृती करण्यात आली. घनकचरा व्यवस्थापन नियम २०२६ चे महत्त्व नागरिकांपर्यंत पोहोचविण्याचाही प्रयत्न करण्यात आला.
समाजातील विविध घटकांच्या उत्स्फूर्त सहभागामुळे हा उपक्रम यशस्वी झाला. स्वच्छता ही सेवा २०२६ अभियान आणि घनकचरा व्यवस्थापन नियम २०२६ ची प्रभावी अंमलबजावणी करण्यासाठी सर्वांनी एकत्रित प्रयत्न करावेत, तसेच स्वच्छ, हरित आणि आरोग्यदायी कॅन्टोन्मेंट उभारण्यासाठी नागरिकांनी आपली जबाबदारी पार पाडावी, असा सामूहिक संदेश या कार्यक्रमातून देण्यात आला.
