मच्छे : येथील प्राथमिक मराठी केंद्र शाळेला मच्छे येथे कार्यरत असलेल्या Quality Animal Feed Pvt. Ltd. कंपनीच्या वतीने एक संगणक व प्रिंटर भेट देण्यात आला. विद्यार्थ्यांना डिजिटल शिक्षणाची ओळख व्हावी, तसेच शाळेच्या प्रशासकीय कामकाजाला गती मिळावी, यासाठी या संगणक व प्रिंटरचा उपयोग होणार आहे.
या देणगीच्या निमित्ताने शाळेत छोटेखानी स्वागत व सत्कार कार्यक्रमाचे आयोजन करण्यात आले होते. कार्यक्रमास Quality Animal Feed कंपनीचे GM डॉ. अजय कुमार माने, तसेच मोहन सिद्धी, कार्तिक खुशबी, राहुल खनगावकर आणि एकनाथ धबाले कंपनीच्या वतीने उपस्थित होते.
कार्यक्रमाच्या प्रारंभी मान्यवरांच्या हस्ते दीपप्रज्वलन व सरस्वती प्रतिमा पूजन करण्यात आले. त्यानंतर नवीन संगणकाचे फीत कापून उद्घाटन करण्यात आले. शाळेच्या वतीने उपस्थित पाहुण्यांचे शाल, हार व पुस्तके देऊन स्वागत व सत्कार करण्यात आला.
यावेळी सत्काराला उत्तर देताना डॉ. अजय कुमार माने म्हणाले, “आम्ही शिक्षण घेत असताना संगणकाचे ज्ञान किंवा त्याचा वापर एवढ्या मोठ्या प्रमाणात नव्हता. मात्र आजच्या काळात संगणकाचे ज्ञान ही प्रत्येक विद्यार्थ्याची गरज बनली आहे. त्यामुळे आपल्या परीने गरजू विद्यार्थ्यांना व शैक्षणिक संस्थांना आवश्यक त्या सुविधा उपलब्ध करून देण्याचा आमचा प्रयत्न असतो.”
शाळेचे माजी विद्यार्थी आणि सध्या Quality Animal Feed येथे कार्यरत असलेले एकनाथ धबाले यांनी शाळेची गरज लक्षात घेऊन कंपनीच्या व्यवस्थापनाशी संपर्क साधला. त्यांच्या पुढाकारातून शाळेला संगणक व प्रिंटर उपलब्ध करून देण्यात आला. आपण ज्या शाळेत शिक्षण घेतले, त्या शाळेसाठी योगदान देण्याची भावना ठेवून माजी विद्यार्थ्यांनी पुढे येणे ही कौतुकास्पद बाब असल्याचे उपस्थितांनी नमूद केले.
या संगणकामुळे विद्यार्थ्यांना संगणकाचे प्राथमिक ज्ञान, डिजिटल शिक्षण आणि विविध शैक्षणिक उपक्रमांचा लाभ घेता येणार आहे. तसेच शाळेच्या दैनंदिन प्रशासकीय कामकाजासाठीही संगणक व प्रिंटर उपयुक्त ठरणार आहे. शाळेची गरज लक्षात घेऊन Quality Animal Feed कंपनीने केलेले हे सहकार्य सामाजिक बांधिलकीचे उदाहरण असल्याचे यावेळी सांगण्यात आले.
शाळेच्या वतीने मोदी टीचर यांनी Quality Animal Feed कंपनीचे आभार मानले.
कार्यक्रमाच्या अध्यक्षस्थानी SDMC अध्यक्ष गजानन छप्रे होते. यावेळी CRP मुल्ला सर यांचीही उपस्थिती होती. तसेच अनिल करडी, प्रशांत नांदोडकर, परशुराम कोलेकर, अमोल लाड, महेश लाड, मोहिनी बाळेकुंद्री, रुपाली कनबरकर, पूजा चौगुले, रुक्मिणी लाड, नम्रता लाड, ज्योती काकतकर आदी उपस्थित होते.
कार्यक्रमाचे सूत्रसंचालन संतोष चोपडे सर यांनी केले, तर आभार प्रदर्शन शेरलेकर मॅडम यांनी केले.
शाळेच्या विकासासाठी कंपनी, माजी विद्यार्थी आणि समाजातील विविध घटकांकडून मिळणाऱ्या सहकार्यामुळे विद्यार्थ्यांना आवश्यक सुविधा उपलब्ध होत आहेत. “समाजाच्या सहकार्याने शाळेचा विकास आणि विद्यार्थ्यांचे उज्ज्वल भविष्य” या उद्देशाने शाळेची वाटचाल सुरू असल्याचे यावेळी नमूद करण्यात आले.
