बेळगाव : महाराष्ट्र एकीकरण युवा समिती सीमाभागचे उपाध्यक्ष तथा भालकी तालुकाध्यक्ष दिनेश मुधाळे यांनी मनसे नेते संदीप देशपांडे यांची भेट घेऊन सीमाभागातील मराठी जनतेची भूमिका, भावना आणि गेल्या अनेक दशकांपासून सुरू असलेल्या सीमालढ्याची वस्तुस्थिती त्यांच्या निदर्शनास आणून दिली. यावेळी महाराष्ट्र एकीकरण युवा समिती सीमाभागचे अध्यक्ष शुभम शेळके यांनीही देशपांडे यांच्याशी फोनवरून संवाद साधत सीमावासीयांच्या भावना मांडल्या.
नारायण गौडा यांच्या भेटीवरून सीमावासीयांमध्ये नाराजी
सीमाभागातील मराठी जनतेचा प्रश्न गेल्या अनेक दशकांपासून सुरू असून, मातृभाषा, अस्मिता आणि महाराष्ट्रात सामील होण्यासाठीचा घटनात्मक लढा हा या संघर्षाचा केंद्रबिंदू असल्याची भूमिका सीमावासीयांकडून मांडली जाते.
या पार्श्वभूमीवर कर्नाटक रक्षण वेदिकेचे नेते नारायण गौडा यांची मनसे नेते संदीप देशपांडे यांनी घेतलेली भेट सीमाभागातील मराठी कार्यकर्ते आणि जनतेच्या जिव्हारी लागल्याचे मुधाळे यांनी देशपांडे यांच्या निदर्शनास आणून दिले.
नारायण गौडा यांनी यापूर्वी बेळगावात मराठी जनतेच्या विरोधात आक्रमक भूमिका घेतल्याचा आरोप सीमाभागातील कार्यकर्त्यांकडून केला जातो. त्यामुळे मराठी अस्मितेसाठी भूमिका घेणाऱ्या मनसेच्या नेत्याने त्यांची भेट घेतल्याने सीमावासीयांमध्ये नाराजी निर्माण झाल्याचे मुधाळे यांनी स्पष्ट केले.
शुभम शेळके यांनी फोनवरून मांडल्या भावना
दिनेश मुधाळे यांच्या भेटीनंतर शुभम शेळके यांचा संदीप देशपांडे यांच्याशी फोनवरून संवाद करून देण्यात आला. यावेळी शेळके यांनी सीमाभागातील मराठी जनतेच्या भावना, कर्नाटक रक्षण वेदिकेची भूमिका तसेच गेल्या अनेक वर्षांपासून मराठी माणूस आपल्या हक्कांसाठी करत असलेल्या संघर्षाची माहिती दिली.
सीमाभागाचा प्रश्न केवळ भाषेपुरता मर्यादित नसून, तो इतिहास, अस्मिता आणि भाषावार प्रांतरचनेच्या पार्श्वभूमीशी संबंधित असल्याचे शेळके यांनी स्पष्ट केले.
देशपांडेंकडून भेटीमागील भूमिका स्पष्ट
यावर संदीप देशपांडे यांनी ही भेट बेळगाव किंवा सीमाप्रश्नाच्या संदर्भात नव्हती, तर देशभरातील हिंदी सक्तीविरोधात व्यापक लढा उभारण्याच्या उद्देशाने झाल्याचे स्पष्ट केल्याचे सांगण्यात आले.
मात्र, सीमावासीयांचा सवाल असा आहे की, हिंदी सक्तीला विरोध करताना मराठीबहुल सीमाभागात अनेक वर्षांपासून सुरू असलेल्या कन्नड सक्तीच्या प्रश्नाचा आणि त्यासंदर्भातील इतिहासाचा विचारही त्याच संवेदनशीलतेने होणे आवश्यक आहे.
“बेळगावचा प्रश्न केवळ भाषिक सक्तीचा नाही”
News18 ला दिलेल्या मुलाखतीतील देशपांडे यांच्या वक्तव्याचा संदर्भ देत सीमावासीयांनी आपली भूमिका स्पष्ट केली आहे. त्यांच्या मते, बेळगावचा प्रश्न हा केवळ “एका भाषेची सक्ती विरुद्ध दुसऱ्या भाषेची सक्ती” एवढ्यापुरता मर्यादित नाही.
भाषावार प्रांतरचनेच्या काळात मराठीबहुल सीमाभाग कर्नाटकात गेल्याची आणि त्यानंतर मराठी जनतेने महाराष्ट्रात सामील होण्यासाठी सातत्याने आंदोलन व घटनात्मक मार्गाने लढा दिल्याची भूमिका सीमावासीयांकडून मांडली जाते.
त्यामुळे सीमाप्रश्नाचा इतिहास, सीमाभागातील मराठी जनतेची सामाजिक-सांस्कृतिक पार्श्वभूमी आणि गेल्या अनेक दशकांतील संघर्ष समजून घेणे गरजेचे असल्याचे मुधाळे आणि शेळके यांनी स्पष्ट केले.
“सीमावासीयांच्या भावना समजून घ्या”
सीमाभागातील मराठी जनता कोणाच्याही विरोधात नसून आपल्या भाषा, संस्कृती आणि अस्मितेच्या संरक्षणासाठी लढत असल्याची भूमिका महाराष्ट्र एकीकरण युवा समितीने मांडली आहे.
“हिंदीची सक्ती असो किंवा कन्नडची सक्ती, सक्ती ही सक्तीच असते. मात्र एका सक्तीला विरोध करताना दुसऱ्या सक्तीच्या इतिहासाकडे दुर्लक्ष झाल्यास सीमाभागातील मराठी माणसाच्या मनातील वेदना अधिक तीव्र होतात,” अशी भावना यावेळी व्यक्त करण्यात आली.
सीमाप्रश्नाचा सखोल अभ्यास करून सीमावासीयांच्या भावना समजून घ्याव्यात आणि या दीर्घकाळ सुरू असलेल्या संघर्षाकडे संवेदनशीलतेने पाहावे, अशी अपेक्षा दिनेश मुधाळे आणि शुभम शेळके यांनी व्यक्त केली.
