बेळगाव | 14 ऑक्टोबर 2025
कर्नाटक रक्षण वेदिकेचा म्होरक्या नारायण गौडा याने दोन दिवसांपूर्वी बेळगावात मराठी भाषिकांविरोधात प्रक्षोभक वक्तव्य केल्याने मराठी समाजात तीव्र संताप उसळला आहे. या वक्तव्याचा निषेध करत, युवा समितीचे सीमाभाग अध्यक्ष शुभम शेळके यांनी समाजमाध्यमांवरून नारायण गौडाला प्रत्युत्तर देत “जशास तसे उत्तर दिले जाईल” असे विधान केले.
या पोस्टच्या पार्श्वभूमीवर माळमारुती पोलीस ठाण्यात शुभम शेळके यांच्या विरोधात गुन्हा दाखल झाल्याची माहिती समोर आली आहे. याच संदर्भात आज सकाळी शुभम शेळके यांना माळमारुती पोलिसांनी चौकशीसाठी बोलावले आहे.
सध्या पोलीस स्थानकात त्यांच्या चौकशीची प्रक्रिया सुरू असून, या प्रकरणाबाबत अधिकृत माहिती अद्याप प्राप्त झालेली नाही. मराठी भाषिक समाजात या घटनेबाबत तीव्र प्रतिक्रिया उमटत असून, मराठी कार्यकर्त्यांनी याला मराठी आवाज दाबण्याचा प्रयत्न असल्याचा आरोप केला आहे.
या प्रकरणाच्या पुढील तपासाची सर्वांची उत्सुकता लागली आहे.
