खैरवाड येथे श्री दुर्गामाता दौडची उत्साहात सांगता; भगव्या पताकांनी अवघी नगरी भगवेमय!

छत्रपती शिवाजी महाराज आणि दुर्गामातेच्या जयघोषाने परिसर दुमदुमला; कु. पुष्कर कोलेकर याचा गावकऱ्यांच्या वतीने भव्य सत्कार

खैरवाड : प्रतिनिधी

श्री शिवप्रतिष्ठान हिंदुस्थान, खैरवाड यांच्या वतीने आयोजित करण्यात आलेल्या श्री दुर्गामाता दौडची उत्साहपूर्ण आणि भक्तिमय वातावरणात सांगता झाली. दौडच्या अंतिम दिवशी गावातील नागरिकांनी पुष्पवृष्टी करून धारकऱ्यांचे स्वागत केले. भगव्या पताका, फुलांच्या आकर्षक रांगोळ्या आणि विविध सजीव देखाव्यांमुळे संपूर्ण खैरवाड नगरी भगवेमय झाली होती. छत्रपती शिवाजी महाराज आणि दुर्गामातेच्या जयघोषाने परिसर दुमदुमून गेला.

शिवस्मारकावरील पूजनाने दौडची सुरुवात

दुर्गामाता दौडचा प्रारंभ दररोज पहाटे ५.३० वाजता शिवस्मारक येथे छत्रपती शिवाजी महाराजांच्या मूर्तीला महाअभिषेक, आरती आणि पूजन करून होत होता. त्यानंतर गावातील विविध मंदिरांना भेटी देत दौड गावातील प्रत्येक गल्लीतून मार्गक्रमण करत होती. या वेळी दररोज एका ठिकाणी प्रसादाचे वाटप करण्यात येत होते.

अंतिम दिवसाच्या दौडचा शुभारंभ गुरव बंधूंच्या हस्ते ध्वजपूजन करून करण्यात आला. यावेळी गावातील विविध भागांत नागरिकांनी पुष्पवृष्टी करत दौडचे स्वागत केले. भगव्या पताका आणि फुलांच्या रांगोळ्यांनी सजलेल्या रस्त्यांमुळे संपूर्ण परिसरात धार्मिक आणि उत्साहपूर्ण वातावरण निर्माण झाले होते.

सजीव देखाव्यांनी वेधले लक्ष

दुर्गामाता दौडच्या अंतिम दिवशी गुरव बंधू, भुजगुरव बंधू आणि कोलेकर बंधू यांच्या वतीने विविध सजीव देखावे सादर करण्यात आले. या देखाव्यांनी उपस्थितांचे लक्ष वेधून घेतले. छत्रपती शिवाजी महाराज आणि दुर्गामातेच्या जयघोषात धारकरी आणि नागरिक मोठ्या उत्साहाने सहभागी झाले.

कु. पुष्कर कोलेकर याचा भव्य सत्कार

या कार्यक्रमात इयत्ता नववीत शिक्षण घेत असलेल्या कु. पुष्कर परशुराम कोलेकर याचा गावकऱ्यांच्या वतीने भव्य सत्कार करण्यात आला. विविध शालेय स्पर्धांमध्ये सहभागी होऊन त्याने उल्लेखनीय यश संपादन केले आहे. त्याच्या शैक्षणिक आणि स्पर्धात्मक कामगिरीची दखल घेत गावकऱ्यांनी त्याचा विशेष सन्मान केला.

यावेळी पुष्करने उपस्थितांना मार्गदर्शन करताना श्री दुर्गामाता दौड ही केवळ धार्मिक परंपरा नसून हिंदवी स्वराज्याचा गौरवशाली इतिहास, शौर्य, संस्कार आणि सामाजिक एकतेची प्रेरणा देणारा उपक्रम असल्याचे सांगितले. अशा उपक्रमांतून युवकांमध्ये धर्म आणि संस्कृतीविषयी आदर, संघटनभावना आणि राष्ट्रभक्तीची मूल्ये अधिक दृढ होतात, असे त्याने नमूद केले.

शिवस्मारकाच्या माध्यमातून शिवसंस्कारांची जपणूक

खैरवाड येथे ६ जून २०२३ रोजी छत्रपती शिवाजी महाराजांच्या स्मारकाची स्थापना करण्यात आली. तेव्हापासून दररोज सकाळी शिवस्मारकाची नित्य पूजा केली जात आहे. या उपक्रमातून गावात शिवचरित्र, संस्कार आणि सामाजिक एकतेची परंपरा जपली जात आहे.

दुर्गामाता दौडच्या यशस्वी आयोजनासाठी परिश्रम घेणाऱ्या श्री शिवप्रतिष्ठान हिंदुस्थान, खैरवाडच्या सर्व धारकऱ्यांचे अभिनंदन करण्यात आले. यावेळी गावातील बंधू-भगिनी, महिलावर्ग, पदाधिकारी, मान्यवर, धारकरी आणि नागरिक मोठ्या संख्येने उपस्थित होते.

नाश्ता वाटपाने दौडची सांगता

कार्यक्रमाच्या शेवटी गुरव बंधूंच्या हस्ते उपस्थितांना नाश्ता देण्यात आला आणि श्री दुर्गामाता दौडची सांगता करण्यात आली. श्री छत्रपती शिवाजी महाराज सेवा संघ, खैरवाड यांच्या वतीने या उत्सवात सहभागी झालेल्या गावातील सर्व लहान-थोर शिवसैनिक, धारकरी, महिला आणि नागरिकांचे मनःपूर्वक आभार व्यक्त करण्यात आले.

जय भवानी! जय शिवाजी! 🚩