📰 के-सेट परीक्षेतून मराठी विषय वगळल्याने संताप : महाराष्ट्र एकीकरण युवा समितीने दिले जिल्हाधिकाऱ्यांना निवेदन

बेळगाव : कर्नाटक राज्य सहाय्यक प्राध्यापक पात्रता परीक्षा (के-एसईटी-२०२५) येत्या २ नोव्हेंबर रोजी होणार आहे. या परीक्षेसाठी यंदा बेळगाव केंद्राची घोषणा करण्यात आली असली तरी परीक्षेतून मराठी विषय वगळण्यात आल्याने संताप व्यक्त होत आहे. याबाबत महाराष्ट्र एकीकरण युवा समितीच्या वतीने जिल्हाधिकाऱ्यांना निवेदन देण्यात आले.

या वर्षी के-सेटसाठी ३३ विषयांमध्ये परीक्षा घेण्यात येणार आहे. त्यामध्ये वाणिज्यशास्त्र, कन्नड, इंग्रजी, हिंदी, राज्यशास्त्र, इतिहास, समाजशास्त्र, भूगोल, कायदा, शिक्षण, समाजकार्य, संगीत आदी विषयांचा समावेश आहे. मात्र पूर्वी असलेला मराठी विषय यावर्षी वगळण्यात आला आहे.

राणी चन्नम्मा विद्यापीठ, धारवाड विद्यापीठ, गुलबर्गा विद्यापीठ, बीदर विद्यापीठ यांसारख्या नामांकित विद्यापीठांमध्ये मराठी विषय आजही शिकवला जातो. सध्या १५०० हून अधिक विद्यार्थी पदव्युत्तर (एम.ए.) स्तरावर मराठीचे शिक्षण घेत आहेत. तरीदेखील के-सेटमधून मराठी वगळल्याने भविष्यात प्राध्यापक होऊ इच्छिणाऱ्या विद्यार्थ्यांचे नुकसान होणार असून त्यांची स्वप्ने अपूर्ण राहतील, असा आरोप समितीकडून करण्यात आला.

प्राध्यापक पदासाठी के-सेट परीक्षा अनिवार्य असल्याने मराठी विद्यार्थ्यांच्या भवितव्याचा विचार करून परीक्षेत मराठी विषय पुन्हा समाविष्ट करावा, अशी मागणी निवेदनातून करण्यात आली आहे. हे निवेदन कार्यकारी संचालक कर्नाटक परीक्षा प्राधिकरण आणि कर्नाटक उच्च शिक्षण मंत्री यांच्या नावे देण्यात आले.

जिल्हाधिकाऱ्यांच्या अनुपस्थितीत शिरस्तेदार फैजी यांनी निवेदन स्वीकारले.

यावेळी युवा समितीचे अध्यक्ष अंकुश केसरकर, कार्याध्यक्ष सचिन केळवेकर, उपाध्यक्ष वासू सामजी, सरचिटणीस श्रीकांत कदम, विनायक कावळे, सुरज कुडूचकर, किरण हुद्दार, संतोष कृष्णाचे, ॲड. वैभव कुट्रे, शेखर तळवार, शांताराम होसुरकर, सुरज चव्हाण, ॲड. अश्वजीत चौधरी आदी उपस्थित होते.

Related Posts

महापालिकेतील अनेक विभाग ठप्प – जन्म-मृत्यू दाखल्यासाठी नागरिकांचे हाल सुरूच

जय किसान भाजी मार्केटला धक्का – उच्च न्यायालयाने दोन्ही याचिका फेटाळल्या

माजी आमदार संभाजीराव पाटील यांची कन्या संध्या पेरनुरकर यांचे निधन

Leave a Reply Cancel reply