बेळगाव /
येथील सार्वजनिक वाचनालयाच्या वतीने आयोजित संगीत भजन स्पर्धेला रविवारी दुपारी मराठा मंदिर येथे उत्साहपूर्ण प्रारंभ झाला. तीन दिवस चालणाऱ्या या भजन स्पर्धेत एकंदर ३१ भजनी मंडळांनी सहभाग नोंदविला असून त्यामध्ये बेळगाव शहर, बेळगाव तालुका तसेच चंदगड तालुक्यातील मंडळांचा समावेश आहे.
रविवारी दुपारी ह. भ. प. दत्तू जट्टेवाडकर यांच्या हस्ते दीपप्रज्वलन करून स्पर्धेचे उद्घाटन करण्यात आले. सार्वजनिक वाचनालयाचे अध्यक्ष अनंत लाड यांनी प्रास्ताविक करून उपस्थितांचे स्वागत केले. “भजन हे फक्त गाणे नसून भक्तीची अनुभूती देणारी साधना आहे. संत तुकाराम, नामदेव, एकनाथ, नरसी मेहता यांसारख्या संतांनी भजनाच्या माध्यमातून जनतेला एकात्मतेचा आणि आत्मिक उन्नतीचा मार्ग दाखविला आहे,” असे ते यावेळी म्हणाले.
यानंतर दत्तू जट्टेवाडकर, वाचनालयाचे ज्येष्ठ सदस्य अ‍ॅड. आय. जी. मुचंडी व अभय याळगी यांच्या हस्ते संतांची प्रतिमापूजन करण्यात आले. अनंत लाड यांनी पाहुण्यांचा सन्मान केला. स्पर्धेचे परीक्षक श्रीकांत सुळेभावकर (कागणी) व बाबुराव सावंत (आजरा) यांचा सत्कार वाचनालयाचे उपाध्यक्ष डॉ. विनोद गायकवाड यांच्या हस्ते झाला. प्रसन्न हेरेकर यांनी आभार मानले, तर सूत्रसंचालन कार्यवाह सुनीता मोहिते यांनी केले. प्रारंभी स्व. गोविंदराव राऊत यांना श्रद्धांजली अर्पण करण्यात आली.
पहिल्या दिवशी कालिकादेवी महिला भजनी मंडळ, बापट गल्ली यांनी मंगलागौर सादर करून स्पर्धेला सुरुवात केली. त्यानंतर तेरा भजनी मंडळांनी आपली कलाकृती सादर केली.
दरम्यान, सोमवारी दुपारी साडेबारा वाजता स्पर्धेचा पुढील टप्पा होणार असून त्यामध्ये ओमकार महिला भजनी मंडळ (हनुमान नगर), दुर्गामाता महिला भजनी मंडळ (बैलूर), जिव्हेश्वर महिला भजनी मंडळ (वडगाव), पंचराशी महिला भजनी मंडळ (राकसकोप), विठ्ठल रखुमाई महिला भजनी मंडळ (कंग्राळी खुर्द), सद्गुरु भजनी मंडळ (भाग्यनगर), ज्ञानेश्वर महिला भजनी मंडळ (राजवाडा कंपाउंड, वडगाव) यांच्यासह इतर अनेक मंडळे सहभागी होणार आहेत.
या भजन स्पर्धेचा आस्वाद घेण्यासाठी रसिकांनी मोठ्या संख्येने उपस्थित राहावे, असे आवाहन वाचनालयाच्या वतीने करण्यात आले आहे.
