बेळगाव, दि. 6 जून : शाश्वत औद्योगिक विकासाच्या दिशेने मोठे पाऊल टाकत अॅक्वस SEZ (Aequs SEZ) ने बेळगाव येथील बेळगाव एरोस्पेस क्लस्टर (BAC) मध्ये जवळपास 100 टक्के अक्षय ऊर्जेचा वापर साध्य केला आहे. यामुळे हा औद्योगिक परिसर भारतातील सर्वात स्वच्छ आणि पर्यावरणपूरक उत्पादन परिसंस्थांपैकी एक ठरला आहे.
250 एकरांहून अधिक क्षेत्रात विस्तारलेल्या या विशेष आर्थिक क्षेत्रात (SEZ) रूफटॉप सौर ऊर्जा प्रकल्प, तृतीय पक्ष हरित ऊर्जा पुरवठादारांकडून मिळणारी अक्षय ऊर्जा आणि राज्य वीज मंडळाकडून मिळणारी हरित वीज यांचा एकत्रित वापर केला जात आहे. त्यामुळे या क्लस्टरमधील सर्व औद्योगिक युनिट्सच्या ऊर्जेची गरज जवळपास पूर्णपणे अक्षय स्त्रोतांमधून भागवली जात आहे.
जागतिक पर्यावरण दिनानिमित्त आयोजित कार्यक्रमात अॅक्वस इन्फ्राचे मुख्य कार्यकारी अधिकारी (CEO) श्याम कल्याणसुंदरम यांनी सांगितले की, “शाश्वतता ही आमच्या कार्यपद्धतीचा अविभाज्य भाग आहे. बेळगावमधील अॅक्वस SEZ हे मोठ्या प्रमाणावरील उत्पादन उद्योग आणि अक्षय ऊर्जा यांचे यशस्वी एकत्रीकरण कसे करता येते याचे उत्तम उदाहरण आहे.”
सध्या या क्लस्टरमध्ये 35 हून अधिक औद्योगिक कंपन्या कार्यरत असून त्या जागतिक एरोस्पेस उद्योगासाठी महत्त्वाचे घटक तयार करतात. स्वतःच्या परवानाधारक वीज वितरण यंत्रणेमुळे या कंपन्यांना विश्वासार्ह आणि कार्यक्षम वीजपुरवठा मिळत असून त्यांच्या ऊर्जा खर्चात 30 टक्क्यांहून अधिक बचत होत असल्याचा दावा करण्यात आला आहे.
बेळगाव एरोस्पेस क्लस्टरची आणखी एक वैशिष्ट्यपूर्ण बाब म्हणजे संपूर्ण उत्पादन साखळी एकाच ठिकाणी उपलब्ध आहे. त्यामुळे पारंपरिक एरोस्पेस उद्योगात हजारो किलोमीटरचा प्रवास करणारे घटक येथे केवळ काहीशे मीटरच्या परिसरात तयार होतात. यामुळे वाहतुकीतून होणारे कार्बन उत्सर्जन मोठ्या प्रमाणात कमी झाले आहे.
अॅक्वस इन्फ्रा आता हाच शाश्वत औद्योगिक विकासाचा नमुना हुबळी आणि कोप्पळ येथील औद्योगिक प्रकल्पांमध्येही राबवत आहे.
