बेळगाव, दि. २ जून : जुन्या गांधीनगर येथील गजानन गल्लीतील एका ५० वर्षीय व्यक्तीचे सोमवारी सिव्हिल हॉस्पिटलमध्ये आजाराने निधन झाले. कुटुंबावर दुःखाचा डोंगर कोसळला असतानाच अंत्यसंस्कारासाठी आवश्यक खर्च उचलण्याचीही त्यांची आर्थिक परिस्थिती नसल्याने कुटुंबीय हतबल झाले होते.
अत्यंत गरीब परिस्थितीत जीवन जगणाऱ्या या कुटुंबासमोर प्रिय व्यक्तीच्या निधनाचे दुःख आणि अंत्यविधीची चिंता असे दुहेरी संकट उभे ठाकले होते. नातेवाईक आणि आप्तस्वकीय जमले असले तरी अंत्यसंस्कारासाठी लागणाऱ्या खर्चाची व्यवस्था करणे कुटुंबाला शक्य होत नव्हते.
ही बाब समजताच माजी महापौर विजय मोरे यांनी तत्काळ पुढाकार घेत मदतीचा हात दिला. त्यांच्या मार्गदर्शनाखाली गंगाधर पाटील, अॅलन विजय मोरे तसेच सदाशिवनगर स्मशानभूमीच्या कर्मचाऱ्यांनी सर्व आवश्यक प्रक्रिया पूर्ण करून हिंदू धर्मपरंपरेनुसार अंत्यसंस्काराची व्यवस्था केली.
वेळीच मिळालेल्या या मदतीमुळे दुःखात बुडालेल्या कुटुंबाला मोठा दिलासा मिळाला. त्यामुळे मृत व्यक्तीला सन्मानपूर्वक आणि प्रतिष्ठेने अखेरचा निरोप देणे शक्य झाले.
या वेळी राजू मुरकुटे, उत्तम पाटील, नातेवाईक, मित्रपरिवार आणि अनेक हितचिंतक उपस्थित होते. शोकाकुल वातावरणात अंत्यविधी पार पडला.
या घटनेतून संकटाच्या काळात मानवता, संवेदनशीलता आणि सामाजिक बांधिलकी जपणाऱ्या व्यक्तींचे महत्त्व पुन्हा अधोरेखित झाले आहे. गरीब कुटुंबाच्या कठीण प्रसंगी पुढे सरसावून दिलेल्या मदतीबद्दल परिसरातून विजय मोरे आणि त्यांच्या सहकाऱ्यांचे कौतुक होत आहे.
