बेळगाव : शहरातील कायदा व सुव्यवस्था राखण्यासाठी माळमारुती पोलिसांनी प्रभावी कारवाई करत दोन वेगवेगळ्या प्रकरणांत आरोपींना अटक केली आहे.
२४ मार्च २०२६ रोजी माळमारुती पोलीस ठाण्याच्या हद्दीत संशयास्पद हालचाली करणाऱ्या जिनेंद्र पद्मप्पा चौगले (रा. शास्त्री गल्ली, बसवन कुडची, बेळगाव) याला ताब्यात घेण्यात आले. त्याच्याकडून धारदार तलवार जप्त करण्यात आली. सार्वजनिक ठिकाणी भीती निर्माण होईल अशा पद्धतीने तो फिरत असल्याचे निदर्शनास आले. या प्रकरणी माळमारुती पोलीस ठाण्यात गुन्हा क्रमांक 55/2026 अन्वये भारतीय शस्त्र कायद्याखाली गुन्हा दाखल करण्यात आला असून पुढील तपास सुरू आहे.
दरम्यान, दुसऱ्या कारवाईत मारिहाळ पोलीस ठाण्याच्या पथकाने मटका जुगारावर छापा टाकला. २४ मार्च रोजी गुडदम्मा गुडी परिसरात सार्वजनिक ठिकाणी मटका सुरू असल्याची माहिती मिळाल्यानंतर पोलिसांनी कारवाई केली. यावेळी निंगप्पा यल्लप्पा नेसरगी (वय ४०, रा. अंकोली, ता. गोकाक) याला अटक करण्यात आली. तसेच नागेश गुडदप्पा बळेशोडी याचाही या प्रकरणात सहभाग आढळून आला.
दोन्ही आरोपींविरुद्ध मारिहाळ पोलीस ठाण्यात गुन्हा क्रमांक 37/2026 अन्वये कर्नाटक पोलीस कायद्यांतर्गत गुन्हा दाखल करण्यात आला असून पुढील तपास सुरू आहे.
या कारवाया माळमारुती व मारिहाळ पोलिसांनी यशस्वीपणे पार पाडल्या असून, वरिष्ठ अधिकाऱ्यांनी त्यांच्या कार्याचे कौतुक केले आहे.
