बेळगाव : शिव गणेश प्रोडक्शन, सिंधुदुर्ग–मुंबई निर्मित आणि धर्मवीर छत्रपती संभाजी महाराजांच्या पराक्रमावर आधारित अजरामर नाट्यप्रयोग “इथे ओशाळला मृत्यू” आज मंगळवार, १६ डिसेंबर रोजी सायंकाळी ७ वाजता बेळगावातील लोकमान्य रंगमंदिर (रिट्झ टॉकीज), कोनवाळ गल्ली येथे सादर होणार आहे.
प्रा. वसंत कानेटकर लिखित व गणेश ठाकूर दिग्दर्शित या नाटकातून छत्रपती संभाजी महाराजांचे अद्वितीय शौर्य, स्वराज्यनिष्ठा, त्याग आणि बलिदान प्रभावीपणे उलगडले जाणार आहे. इतिहासप्रेमी, तरुणाई आणि कुटुंबीयांसाठी हा नाट्यप्रयोग एक अविस्मरणीय अनुभव ठरणार आहे.
नाटकात डॉ. सोनल लेले, प्रा. मिलिंद कासार, कृष्णा देसाई, पत्रकार संदेश देसाई, अजिंक्य देसाई, दीपक झोरे, मंदार जंगम, आदेश खानोलकर यांच्या प्रमुख भूमिका असून छत्रपती संभाजी महाराजांच्या भूमिकेत गणेश ठाकूर प्रेक्षकांसमोर साकार होणार आहेत. भक्कम अभिनयासोबतच ध्वनी, प्रकाश, नेपथ्य, रंगभूषा व पार्श्वसंगीत या सर्व तांत्रिक बाजूंनी नाटक अत्यंत प्रभावी सादरीकरण देणार आहे.
या नाट्यप्रयोगासाठी तिकीट दर ₹५००, ₹४००, ₹३०० व ₹२०० असे ठेवण्यात आले आहेत. तिकिटे लोकमान्य रंगमंदिर येथे उपलब्ध असून BookMyShow वरही ऑनलाईन विक्री सुरू आहे. अधिक माहितीसाठी गुरु पेडणेकर – ९३४२९३९५७० यांच्याशी संपर्क साधता येणार आहे.
इतिहासाचा जिवंत अनुभव घेण्यासाठी आणि धर्मवीर छत्रपती संभाजी महाराजांच्या शौर्याला मानवंदना देण्यासाठी आज सायंकाळी रसिकांनी मोठ्या संख्येने उपस्थित राहावे, असे आवाहन आयोजकांनी केले आहे.
