बेळगाव : नुकत्याच बेंगलोर येथील झी स्विमिंग अकॅडमी येथे कर्नाटक राज्य पॅरा जलतरण संघटनेतर्फे आयोजित राज्यस्तरीय पॅरा जलतरण स्पर्धेत बेळगावच्या आबा हिंद क्लबच्या जलतरणपटूंनी उत्कृष्ट कामगिरी करत १० सुवर्ण आणि ५ रौप्य पदके जिंकत बेळगावचा मान उंचावला आहे.
या स्पर्धेत कुमार ओम जुवळी याने एक सुवर्ण आणि दोन रौप्य पदके, कुमार शुभम कांबळे याने दोन सुवर्ण आणि एक रौप्य पदक, कुमार मयांक हलदर याने एक सुवर्ण आणि दोन रौप्य पदके, कुमार विशाल पवार याने एक सुवर्ण पदक, तर कुमारी संचिता सातपुते आणि कुमारी आरोही सुरतकर यांनी प्रत्येकी तीन सुवर्ण पदके जिंकत शानदार कामगिरी केली.
हे सर्व जलतरणपटू गोवावेस येथील कार्पोरेशनच्या जलतरण तलावात नियमित सराव करतात. त्यांना एनआयएस प्रशिक्षक विश्वास पवार, रणजीत पाटील आणि विशाल वेसणे यांचे मार्गदर्शन लाभत आहे.
बेळगावच्या या जलतरणपटूंनी राज्यस्तरीय स्पर्धेत मिळवलेल्या या यशामुळे संपूर्ण जिल्ह्याचा अभिमान वाढला असून, त्यांच्या पुढील राष्ट्रीय स्पर्धांसाठी शुभेच्छा व्यक्त केल्या जात आहेत.
