कुरबरहट्टी, ता. बेळगाव :
ग्रामीण भागातील कुरबरहट्टी मराठी शाळेत आज एका विद्यार्थ्याने समाजाला प्रेरणा देणारा आगळावेगळा वाढदिवस साजरा केला. जय अमृत खेमनाळकर या विद्यार्थ्याने आपल्या वाढदिवसानिमित्त वर्गातील प्रत्येक मित्राला शाळेची जर्सी भेट देत शिक्षणप्रेम आणि वाटण्याची संस्कृती यांचे सुंदर उदाहरण घालून दिले.
दिखाव्याच्या वाढदिवसांपेक्षा शैक्षणिक प्रगतीसाठी उपयुक्त अशी भेट देत जयने व त्यांचे वडील अमृत खेमनाळकर यांनी पालक आणि समाजासमोर एक आदर्श ठेवला आहे. या उपक्रमामुळे विद्यार्थ्यांमध्ये एकोपाला चालना मिळून शाळेबद्दलची बांधिलकीही अधिक मजबूत होणार असल्याचे शिक्षकांनी सांगितले.
कार्यक्रमाला बी.ओ. आर. के. अंजनेय , सी.आर.पी. सौ. विराट्थीमठ , मुख्याध्यापक विजय गोऱल, पी.व्ही. पाट्टर, एसडीएमसी सदस्य, तसेच आशा कार्यकर्त्या लता रेमनाचे उपस्थित होत्या. बी ओ अंजनेय यांनी जयच्या उपक्रमाचे विशेष कौतुक करत, “ग्रामीण भागातील विद्यार्थ्यांनी असा सकारात्मक आदर्श ठेवणे म्हणजे समाजासाठी मोठा संदेश आहे,” असे मत व्यक्त केले.
सीआरपी मॅडम आणि एसडीएमसी सदस्यांनीही या अभिनव वाढदिवसाचे कौतुक केले. शिक्षणाच्या माध्यमातून समाजात सकारात्मक बदल घडू शकतात, याचे उत्तम उदाहरण म्हणून या कार्यक्रमाने सर्वांचे लक्ष वेधून घेतले.
