हलशी, ता. खानापूर (३१ जुलै): छत्रपती शिवाजी विद्यालय, हलशी येथे गेल्या ३६ वर्षांपासून शिपाई पदावर कार्यरत असलेले श्री. लक्ष्मण गावडा (राहणार हत्तरवाड) हे आज सेवानिवृत्त झाले. त्यांच्या प्रदीर्घ सेवेसाठी शाळा परिवाराच्या वतीने विशेष सत्कार समारंभ आयोजित करण्यात आला.
श्री. गावडा यांनी केवळ शाळेतील एक कर्मचारी म्हणून नव्हे, तर शिक्षक केंद्रातही नियमितपणे जबाबदारी पार पाडत शाळेच्या शिस्त, स्वच्छता आणि विद्यार्थ्यांच्या सेवेत योगदान दिले. त्यांच्या सहकार्यामुळे अनेक आजी-माजी विद्यार्थी, शिक्षक व पालक यांच्याशी त्यांनी आपुलकीचे नाते जपले.
या सत्कार समारंभात प्रमुख पाहुण्यांच्या हस्ते त्यांना शाल, श्रीफळ, पुष्पगुच्छ व सन्मानचिन्ह देऊन गौरविण्यात आले. कार्यक्रमात अनेक शिक्षक, विद्यार्थी आणि ग्रामस्थांनी आपली मनोगते व्यक्त करत गावडा यांचे कार्य कौतुकास्पद असल्याचे सांगितले.
गावडा यांना त्यांच्या पुढील आयुष्यासाठी शुभेच्छा देताना सर्वांनी “दीर्घायुष्यासाठी आणि उत्तम आरोग्यासाठी” सदिच्छा व्यक्त केल्या.
