📰 बेळगाव : आचार्य अत्रे साहित्य पुरस्काराने ज्येष्ठ साहित्यिक लक्ष्मीकांत देशमुख यांचा गौरव

बेळगाव – “आचार्य अत्रे हे आभाळाएवढे मोठे साहित्यिक होते. ते साहित्य सम्राट होते. अत्रे म्हणजे चिरंतन मूल्ये जपणारा साहित्यिक काव्याचा जनक” असे गौरवोद्गार अखिल भारतीय मराठी साहित्य संमेलनाचे माजी अध्यक्ष तथा ज्येष्ठ साहित्यिक लक्ष्मीकांत देशमुख यांनी काढले.

येथील सार्वजनिक वाचनालयाच्या वतीने रविवारी आयोजित कार्यक्रमात श्री. देशमुख यांना आचार्य अत्रे साहित्य पुरस्काराने सन्मानित करण्यात आले. वाचनालयाच्या सभागृहात झालेल्या या कार्यक्रमात वाचनालयाचे अध्यक्ष अनंत लाड यांच्या हस्ते त्यांना पंचवीस हजार रुपये रोख, स्मृतिचिन्ह आणि प्रशस्तीपत्र असे पुरस्काराचे स्वरूप बहाल करण्यात आले.

“आचार्य अत्रे यांचे भाषा, समाज आणि संस्कृती बाबतचे योगदान” या विषयावर देशमुख यांनी भाष्य करताना अत्रे यांच्या साहित्यिक व सामाजिक चळवळीचा आढावा घेतला. सीमा प्रश्नाच्या सोडवणुकीसाठी त्यांनी दिलेला लढा, लोककला हे प्रबोधनाचे माध्यम म्हणून त्यांनी वापरलेली नाटके, ‘श्यामची आई’ पासून मराठी चित्रपटसृष्टीत केलेले योगदान याचा त्यांनी विशेष उल्लेख केला.

ते पुढे म्हणाले की – “लेखकाला सहानुभूती असली पाहिजे. अत्रे यांची साहित्यदृष्टी सर्वसमावेशक व बहुजन हिताची होती. स्त्रियांचा विकास व समाजातील वैचारिक क्रांती हे त्यांचे ध्येय होते. अत्रे बंडखोर होते पण तितकेच नम्र व कर्तृत्ववान होते. त्यांचे साहित्य आजच्या कठीण परिस्थितीत प्रेरणा देणारे आहे.”

प्रारंभी वाचनालयाचे अध्यक्ष अनंत लाड यांनी प्रास्ताविक करून उपस्थितांचे स्वागत केले. उपाध्यक्ष डॉ. विनोद गायकवाड यांनी देशमुख यांच्या साहित्य सेवेचा परिचय करून दिला. प्रसन्न हेरेकर यांनी आभार प्रदर्शन केले, तर सुनिता मोहिते यांनी कार्यक्रमाचे सूत्रसंचालन केले.

या कार्यक्रमाला वाचनालयाचे सर्व संचालक, कर्मचारी तसेच विविध क्षेत्रातील मान्यवर मोठ्या संख्येने उपस्थित होते.

Related Posts

महाराष्ट्र-कर्नाटक सीमा प्रश्नावरील तज्ञ समितीची बैठक मंत्रालयात

बीडीसीसी बँक निवडणूक रणांगण तापलं – मदीहळी गावात गोंधळ

‘गुरु वंदना – छात्र अभिनंदन’ कार्यक्रम अपूर्व उत्साहात पार पडला

Leave a Reply Cancel reply