बेळगावजवळील मुचंडी येथील ग्रामदैवत श्री सिद्धेश्वर यात्रा २०२६ ला आज, १ एप्रिलपासून उत्साहात सुरुवात झाली आहे. या यात्रेनिमित्त पुढील सहा दिवस विविध धार्मिक व पारंपरिक कार्यक्रमांचे आयोजन करण्यात आले असून परिसरात भक्तीमय वातावरण निर्माण झाले आहे.
या यात्रेचे मुख्य आकर्षण म्हणजे सजवलेल्या आंबिल गाड्यांची भव्य मिरवणूक, इंगळ्यांचा (अग्निदिव्य) थरारक कार्यक्रम तसेच पारंपरिक वाद्यांच्या गजरात निघणारा पालखी सोहळा. या सर्व कार्यक्रमांसाठी दरवर्षीप्रमाणे यंदाही हजारो भाविकांची मोठी गर्दी अपेक्षित आहे.
कार्यक्रमानुसार गुरुवारी आंबिल गाड्यांची मिरवणूक होणार आहे. शुक्रवारी इंगळ्यांचा थरारक कार्यक्रम पार पडणार असून भाविक त्यात उत्साहाने सहभागी होतात. त्यानंतर शनिवार, रविवार आणि सोमवारी कुस्तीच्या आखाड्यांचे आयोजन करण्यात आले आहे, ज्यामध्ये विविध भागांतील मल्ल सहभागी होणार आहेत.
मुचंडी ही बेळगाव शहराजवळील गाव असून, येथील श्री सिद्धेश्वर यात्रा ही परिसरातील एक महत्त्वाची धार्मिक परंपरा मानली जाते. यात्रेमुळे गावात मोठी उलाढाल होत असून भाविकांच्या उपस्थितीमुळे उत्सवाला विशेष रंगत येत आहे.
