बेळगाव/बंगळूर:
कर्नाटक सरकारने दहावी (SSLC) परीक्षेच्या गुणपद्धतीत महत्त्वाचा बदल करत तिसऱ्या भाषेचे गुण एकूण मार्क्समधून वगळण्याचा निर्णय घेतला आहे. या निर्णयानुसार तिसऱ्या भाषेला आता संख्यात्मक गुणांऐवजी A, B अशा ग्रेड्स दिल्या जाणार आहेत.
शालेय शिक्षणमंत्री मधु बंगारप्पा यांनी ही घोषणा करताना सांगितले की, या बदलामुळे विद्यार्थ्यांवरील परीक्षेचा ताण कमी होईल. यामुळे एकूण गुणसंख्या 625 वरून 525 पर्यंत कमी करण्यात आली आहे. तसेच, तिसऱ्या भाषेच्या पेपरमध्ये अपयश आल्यास विद्यार्थ्यांच्या उत्तीर्णतेवर किंवा रँकिंगवर परिणाम होणार नाही.
सरकारच्या या निर्णयाचे काही कन्नड समर्थक संघटनांनी स्वागत केले असून, हिंदी सक्तीविरोधातील एक पाऊल म्हणून त्याकडे पाहिले जात आहे. मात्र, दुसरीकडे काही नेते आणि तज्ज्ञांनी या निर्णयावर टीका करत, हिंदी भाषिक भागात नोकरीच्या संधींवर याचा नकारात्मक परिणाम होऊ शकतो, अशी चिंता व्यक्त केली आहे.
दरम्यान, या निर्णयामुळे राज्यात दोन-भाषा धोरण विरुद्ध तीन-भाषा धोरण या वादाला पुन्हा एकदा तोंड फुटले असून, शिक्षण क्षेत्रात याचे दूरगामी परिणाम होण्याची शक्यता व्यक्त केली जात आहे.
