बेळगाव प्रतिनिधी : माळमारुती पोलिसांनी शनिवारी गॅंगवाडी परिसरात बेकायदेशीर दारू विक्री करणाऱ्या अड्ड्यावर धाड टाकून तब्बल 1 लाख 10 हजार रुपये किमतीचा दारू साठा जप्त केला. मात्र पोलिसांची धाड पडताच एका महिलेसह तिघा आरोपींनी घटनास्थळावरून पळ काढला.
फरार आरोपींमध्ये बाळू दत्ता सकट, ओंकार बाळू सकट आणि एका महिलेचा समावेश आहे. श्री गणेश विसर्जनाच्या पार्श्वभूमीवर जिल्हाधिकाऱ्यांनी दारू विक्रीवर बंदी घातली असतानाही गॅंगवाडी येथे उघडपणे विक्री सुरू असल्याची माहिती मिळाल्यानंतर पोलिस उपनिरीक्षक व्ही. एम. मोहिते यांच्या नेतृत्वाखाली पथकाने धाड टाकली.
त्यावेळी आरोपींनी पोलिसांना चकवा देत पळ काढला, मात्र घटनास्थळी विविध कंपन्यांच्या व्हिस्की, रमच्या टेट्रापॅक बॉक्सेस तसेच बिअर बाटल्यांचे बॉक्स आढळून आले. पोलिसांनी हे सर्व साहित्य ताब्यात घेतले असून त्याची किंमत सुमारे 1.10 लाख रुपये इतकी असल्याचे सांगण्यात आले.
या प्रकरणी माळमारुती पोलिस ठाण्यात गुन्हा दाखल करण्यात आला असून फरार आरोपींचा शोध सुरू आहे.
