बेळगाव (प्रतिनिधी) हिंडलगा गणेश मंदिराजवळील परिसरात भटक्या कुत्र्यांचा वावर मोठ्या प्रमाणात वाढला असून यामुळे परिसरातील नागरिकांमध्ये भीतीचे वातावरण निर्माण झाले आहे. मंदिराशेजारीच उद्यान असल्याने येथे दररोज मोठ्या प्रमाणात लहान मुले खेळण्यासाठी येतात, तसेच सकाळ–संध्याकाळ अनेक जेष्ठ नागरिक या परिसरात फेरफटका मारत असतात.
याचदरम्यान एका जेष्ठ नागरिकांचा काही भटक्या कुत्र्यांनी पाठलाग केल्याची घटना घडली. अचानक पळापळीमध्ये संतुलन सुटल्याने ते पडले आणि जखमी होण्यापासून थोडक्यात बचाव झाला. या घटनेनंतर स्थानिक रहिवाशांमध्ये मोठी चिंता निर्माण झाली आहे.
प्राईस फर्निचरचे मालक राव म्हणाले की, भटक्या कुत्र्यांची संख्या दिवसेंदिवस वाढत असून लहान मुलांच्या सुरक्षेचा प्रश्न गंभीर बनला आहे. कोणतीही गंभीर किंवा अप्रिय घटना घडण्याआधीच महानगरपालिकेने तातडीने कारवाई करून कुत्र्यांचे निर्बीजिकरण, पकड मोहीम आणि स्वच्छतेच्या उपाययोजना राबवाव्यात. इतर नागरिकांमधून देखील अशी मागणी परिसरातून जोर धरत आहे.
नागरिकांनी प्रशासनाने तत्काळ लक्ष देऊन सुरक्षित वातावरण निर्माण करावे, अशी अपेक्षा व्यक्त केली आहे.
