बेळगाव (प्रतिनिधी) : बेळगावमध्ये होणाऱ्या हिवाळी अधिवेशनाच्या पार्श्वभूमीवर महामेळावा आयोजित करण्याची तयारी करणाऱ्या महाराष्ट्र एकीकरण समितीच्या कार्यकर्त्यांविरोधात कडक कारवाईची मागणी करण्यात आली आहे. या संदर्भात गृहमंत्री जी. परमेश्वर यांना करवे तर्फे सविस्तर निवेदन देण्यात आले.
निवेदनात म्हटले आहे की, अधिवेशनादरम्यान कायदा-सुव्यवस्था बिघडवण्याचा प्रयत्न होऊ नये, म्हणून मेळावा आयोजित करण्याचा प्रयत्न करणाऱ्या समिती कार्यकर्त्यांना तात्काळ अटक करून हद्दपार करण्यात यावे. बेळगावची शांतता, सुव्यवस्था आणि सार्वजनिक सुरक्षेच्या दृष्टीने ही कारवाई आवश्यक असल्याचे अजब तर्क करवे ने केले आहेत.
गृहमंत्र्यांनी परिस्थितीचा आढावा घेऊन योग्य ती कायदेशीर पावले उचलण्याचा विश्वास दिल्याचे समजते.
सीमाभागात सातत्याने अशांतता पसरविणाऱ्या करवे कडून समितीवर कायदा सुव्यवस्थे संदर्भात टिप्पणी करणे मराठी भाषिकांतून हास्यास्पद मानले जात आहे.
एकंदरीत या मुळे पुन्हा एकदा सीमाभागात वातावरण तापण्याची चिन्हे दिसत आहेत.
