चलवेनहट्टी (ता. बेळगाव) येथे शनिवारी दुपारी घडलेल्या भीषण अपघातात शिवाजी आनंद राजाई (वय २८, रा. किटवाड) या तरुणाचा दुर्दैवी मृत्यू झाला. बोलेरो पीक-अप वाहनाने भरधाव वेगात मोटरसायकलला जोरदार धडक दिल्याने हा अपघात घडला.
शिवाजी राजाई हा शनिवारी दुपारी मोटरसायकलवरून बेळगावकडे येत होता. त्याचवेळी बेळगावकडून चलवेनहट्टीकडे जाणाऱ्या बोलेरो पीक-अपने त्याच्या मोटरसायकलला जोरदार धडक दिली. या धडकेत तो गंभीर जखमी झाला. तातडीने त्याला उपचारासाठी खाजगी रुग्णालयात दाखल करण्यात आले; मात्र उपचारादरम्यान सायंकाळी साडेचारच्या सुमारास त्याचा मृत्यू झाला.
घटनेची नोंद काकती पोलीस स्थानकात झाली असून पोलीस निरीक्षक सुरेश शिंगे यांच्या मार्गदर्शनाखाली पुढील तपास सुरू आहे. मृत शिवाजी राजाई हा खाजगी रुग्णालयात एक्स-रे टेक्निशियन म्हणून कार्यरत होता.
