उडुपी : राज्यातील सिद्धरामय्या सरकारविरोधात पुढील महिन्यात होणाऱ्या बेळगाव अधिवेशनात अविश्वास ठराव आणणार असल्याची घोषणा भाजपचे राज्य महासचिव व माजी मंत्री व्ही. सुनील कुमार यांनी केली. भाजपसोबत एनडीए सहयोगी जनता दल (सेक्युलर)ही ठरावाला साथ देणार आहे.
सुनील कुमार म्हणाले की, काँग्रेस सरकार कोसळल्यास भाजप सत्ता स्थापनेसाठी दावा करणार नाही.
उडुपी येथे पत्रकारांशी बोलताना त्यांनी गंभीर आरोप केले. “मुख्यमंत्री सिद्धरामय्या आणि उपमुख्यमंत्री डी. के. शिवकुमार यांच्या नेतृत्वबदलाच्या संघर्षामुळे गेल्या दोन महिन्यांपासून प्रशासन ठप्प आहे,” असे ते म्हणाले.
त्यांनी दावा केला की, “राज्यातील सुमारे ९० टक्के मंत्री विद्यान सौधातील दालनात उपस्थितच राहत नाहीत. शासनयंत्रणा पूर्णपणे दिशाहीन झाली आहे.”
सुनील कुमार यांनी पुढे आरोप केला की, या सरकारमध्ये विश्वास उरलेला नाही. मुख्यमंत्री–उपमुख्यमंत्री, मंत्री–आमदार यांच्यात समन्वय हरवला असून सरकार स्वतःच्या लोकांचा विश्वासही जिंकू शकत नाही.
भाजप–जेडी(S)कडून अविश्वास ठराव मांडण्याची घोषणा झाल्याने आगामी बेळगाव अधिवेशनात राज्याच्या राजकारणात मोठी खळबळ उडण्याची शक्यता आहे.
