बेळगाव : मूळचे सीमाभागातील आणि सध्या रायगड जिल्ह्यात आपली कर्मभूमी घडवलेले पत्रकार नरेश पाटील यांनी बेळगाव येथे अल्पकाळाच्या दौऱ्यात मराठी अस्मितेसाठी आयुष्य वेचलेल्या मध्यवर्ती महाराष्ट्र एकीकरण समितीचे (MES) अध्यक्ष स्व. दीपक दळवी यांना भावपूर्ण श्रद्धांजली अर्पण केली.
स्व. दीपक दळवी हे सीमाभागातील मराठी जनतेच्या हक्कांसाठी अखंड लढा देणारे ठाम, अभ्यासू आणि जिद्दी नेतृत्व म्हणून ओळखले जात होते. त्यांच्या निधनामुळे मराठी चळवळीमध्ये मोठी पोकळी निर्माण झाली असून, त्यांच्या कार्याची उणीव दीर्घकाळ जाणवत राहील, अशा भावना यावेळी व्यक्त करण्यात आल्या.
या प्रसंगी महाराष्ट्र एकीकरण समितीच्या युवा समितीचे कार्याध्यक्ष धनंजय पाटील उपस्थित होते. त्यांनीही स्व. दळवी यांच्या कार्याचा गौरव करत त्यांच्या स्मृतींना अभिवादन केले.
तसेच, आपल्या दौऱ्यादरम्यान नरेश पाटील यांनी महाराष्ट्र एकीकरण युवा समिती सीमाभागचे अध्यक्ष शुभम शेळके यांच्या निवासस्थानी भेट देऊन त्यांच्या वडिलांच्या निधनाबद्दल शोक व्यक्त केला. त्यांनी दिवंगत आत्म्यास श्रद्धांजली अर्पण करत शोकाकुल कुटुंबीयांचे सांत्वन केले.
नरेश पाटील यांचा हा दौरा केवळ औपचारिक न राहता सीमाभागाशी असलेली त्यांची जिव्हाळ्याची नाळ आणि सामाजिक बांधिलकी अधोरेखित करणारा ठरला. सीमाभागातून उभारी घेत रायगडमध्ये कार्यरत असतानाही त्यांनी आपल्या मातीतल्या लोकांशी नाते जपले आहे, हे त्यांच्या या भेटीतून स्पष्टपणे दिसून आले.
