📰 बेळगावात “त्या”डिजिटल मीडियाविरोधात तक्रार – धार्मिक रंग देऊन समाजात तेढ निर्माण करण्याचा आरोप

बेळगाव : छत्रपती शिवाजी महाराज उद्यान समोरील फास्टफूड स्टॉलवर वापरले जाणारे पाणी हे नजीकच्या इमारतीच्या बंद बेसमेंटमध्ये साचलेले घाण पाणी असल्याची गंभीर बाब काही नागरिकांच्या निदर्शनास आली. या संदर्भातील व्हिडिओ बेधडक बेळगाव पेजवरून प्रसारित होताच महापालिकेकडे तातडीने कारवाईची मागणी करण्यात आली. त्यानंतर स्थानिक नागरिकांनी संबंधित स्टॉलधारकांना जाब विचारला आणि महापालिकेने तातडीने गाळा बंद केला.

मात्र या कारवाईनंतर स्टॉलधारकांनी शाहापूर पोलिस ठाण्यात तक्रार देत सदर माहिती खोटी असून जाणूनबुजून बदनामी करण्यात येत असल्याचा आरोप केला. विशिष्ट समाजाला लक्ष्य केले जात असल्याचा दावा करत, धार्मिक रंग देण्याचा प्रयत्न केल्याचेही म्हटले. यानंतर एका उर्दू डिजिटल मीडिया चॅनेलने ही बाब धार्मिक तणाव निर्माण होईल अशा पद्धतीने प्रसारित केल्याने नागरिकांमध्ये संतापाची लाट उसळली.

या पार्श्वभूमीवर संतप्त नागरिकांनी आज बेळगाव शहर पोलिस आयुक्तांची भेट घेऊन संपूर्ण प्रकरणाची माहिती दिली. त्यांनी ठोस पुरावे, व्हिडिओ आणि प्रत्यक्षदर्शींची माहिती पुरवत, आरोग्यविषयक गंभीर मुद्द्याला जाणूनबुजून धार्मिक वळण देऊन सामाजिक सलोखा बिघडविण्याचा येथे प्रयत्न झाल्याचे निदर्शनास आणून दिले. सत्यता समोर आणणाऱ्या बेधडक बेळगाव पेजसह तीन नागरिकांची नाहक बदनामी करण्यात आल्याचाही आरोप करण्यात आला.

पोलिस आयुक्तांनी स्थानिक पोलिस निरीक्षकांकडून अधिक माहिती घेऊन योग्य ती पावले उचलण्याचे आश्वासन दिले. याच प्रकरणाचे निवेदन बेळगाव दक्षिणचे आमदार अभय पाटील यांनाही देण्यात आले. त्यांनी देखील प्रकरणाकडे गांभीर्याने पाहण्याची ग्वाही दिली. सदर निवेदनाची प्रत महापालिका आयुक्तांकडेही पोहचविण्यात आली आहे.

या संपूर्ण प्रकारात धार्मिक तेढ निर्माण होईल अशा हेतूने बातमी प्रसारित केल्याबद्दल ‘त्या’ चॅनेलविरोधात संताप व्यक्त करण्यात येत आहे. श्री राम सेना हिंदुस्थानचे अध्यक्ष रमाकांत कोंडुस्कर यांनी सुद्धा बेधडक बेळगावच्या पाठीशी असल्याचे सांगत, संबंधित डिजिटल मीडियावर कडक कारवाईची मागणी केली.

श्रीराम सेना चे रवी कोकीतकर यांनी देखील याबाबत पाठपुरवठा केला.

निवेदन देताना सुनील चौधरी, विकास खांडेकर, राम बनवाणी, अश्विनी लेंगडे, सत्यम नाईक, कुलदीप पाटील, यासह अनेक नागरिक उपस्थित होते.