बेळगाव, ६ जुलै २०२५:
बेळगाव कॅंटोन्मेंट बोर्डाच्या हद्दीतील रस्त्यांची अवस्था सध्या अत्यंत बिकट झाली असून, नागरिकांना व वाहनचालकांना दररोज मोठ्या अडचणींचा सामना करावा लागत आहे. पावसामुळे रस्त्यांवर मोठे खड्डे पडले असून डांबरीकरण उखडले आहे. सर्वत्र चिखल, पाणी आणि धोकादायक खड्डे यामुळे वाहतुकीस अडथळा निर्माण होत आहे.
सर्वात चिंतेची बाब म्हणजे बेळगाव कॅंटोन्मेंटमधील वाहतूक पोलीस ठाण्याच्या समोरच रस्ता अतिशय खराब असूनही प्रशासन व संबंधित यंत्रणा याकडे पूर्णतः दुर्लक्ष करत आहेत. वाहतूक पोलीस स्थानक असतानाही त्याच ठिकाणी खड्ड्यांचा खचाखच रस्ता हे प्रशासनाच्या उदासीनतेचे प्रतिक आहे.
या भागातील रस्त्यांवरून चालणे किंवा वाहन चालवणे अतिशय धोकादायक बनले आहे. वृद्ध, विद्यार्थी, महिला आणि दुचाकीस्वार यांना दिवसेंदिवस जिव्हारी लागणारा अनुभव येत आहे. काही ठिकाणी अपघाताचीही शक्यता वाढली आहे.
कॅंटोन्मेंट क्षेत्रात रस्त्यांची देखभाल कॅंटोन्मेंट बोर्डची आहे की महापालिकेची, यावर अद्याप स्पष्टता नसल्यामुळे जबाबदारी ढकलण्याचे प्रकार सुरू आहेत. दरम्यान, नागरिकांचे म्हणणे आहे की कोणीही जबाबदारी घेत नाही, आणि याचा फटका सर्वसामान्यांना सहन करावा लागत आहे.
बेळगाव कॅंटोन्मेंट हे शहरातील महत्वाचे प्रशासकीय आणि लष्करी केंद्र आहे. अशा ठिकाणी रस्त्यांची ही अवस्था प्रशासनाच्या कार्यक्षमतेवर प्रश्नचिन्ह उभे करते. नागरिकांनी यासंदर्भात तातडीने कारवाई करण्याची मागणी केली आहे.
