ग्रामीण भागातील विद्यार्थ्यांपर्यंत दर्जेदार व गुणवत्तापूर्ण शैक्षणिक मार्गदर्शन पोहोचावे, या उदात्त हेतूने गेली अकरा वर्षे सातत्याने सुरू असलेल्या कै. श्री. एम. डी. चौगुले व्याख्यानमालेचे उद्घाटन मोठ्या उत्साहात पार पडले. या व्याख्यानमालेचे उद्घाटन प्रा. सौ. छाया अरविंद पाटील, ग्रामपंचायत सदस्य श्री. रामचंद्र कुद्रेमाणिकर व संयोजक श्री. आर. एम. चौगुले यांच्या शुभहस्ते करण्यात आले.
उद्घाटनप्रसंगी विद्यार्थ्यांना मार्गदर्शन करताना प्रमुख वक्ते प्राचार्य अरविंद पाटील म्हणाले,
“विद्यार्थ्यांनो, उज्ज्वल भवितव्य सहज मिळत नाही. त्यासाठी संघर्षाला सोबतीला ठेवून सातत्याने परिश्रम करावे लागतात. मेहनत, शिस्त आणि चिकाटी हीच यशाची खरी गुरुकिल्ली आहे.”
यावेळी प्राचार्य पाटील यांनी श्री. आर. एम. चौगुले यांच्या कार्याचा विशेष गौरव केला. ते म्हणाले,
“कोणताही गाजावाजा न करता, कोणतीही आर्थिक अपेक्षा न ठेवता, केवळ समाजऋणाच्या भावनेतून चौगुले सरांनी ग्रामीण विद्यार्थ्यांसाठी ही शैक्षणिक चळवळ उभी केली आहे. हे कार्य केवळ व्याख्यानमाला नसून ग्रामीण शिक्षणाला दिशा देणारे प्रेरणास्थान आहे.”
गेल्या अकरा वर्षांपासून श्री. आर. एम. चौगुले हे बेळगावातील नामवंत, अनुभवी व विषयतज्ज्ञ शिक्षकांना ग्रामीण भागात आणून दहावीच्या विद्यार्थ्यांसाठी मार्गदर्शनपर व्याख्यानमाला आयोजित करत आहेत. आजवर हजारो विद्यार्थ्यांनी या उपक्रमाचा लाभ घेतला असून, अनेक विद्यार्थ्यांच्या यशामागे या व्याख्यानमालेचा मोलाचा वाटा आहे.
ग्रामीण विद्यार्थ्यांमधील न्यूनगंड दूर करणे, योग्य अभ्यासदिशा देणे, परीक्षेची भीती कमी करून आत्मविश्वास निर्माण करणे आणि स्वप्न पाहण्याची जिद्द जागवणे, हे या व्याख्यानमालेचे प्रमुख उद्दिष्ट आहे. या उपक्रमामागील संयोजक श्री. आर. एम. चौगुले मित्रमंडळ निस्वार्थ भावनेने कार्यरत असून, कोणतीही अपेक्षा न ठेवता नियोजन व संयोजनाची जबाबदारी पार पाडत आहे. त्यामुळे ही व्याख्यानमाला सामाजिक बांधिलकीचे जिवंत उदाहरण ठरत आहे.
कार्यक्रमाच्या शेवटी विद्यार्थ्यांमध्ये प्रचंड उत्साह व सकारात्मक ऊर्जा दिसून आली. “अशी व्याख्यानमाला आमच्यासाठी दिशा दाखवणारी आहे,” अशी भावना अनेक विद्यार्थ्यांनी व्यक्त केली.
व्याख्यानमालेच्या पहिल्या दिवशी सी. वाय पाटील यांचे मराठी विषयावर व्याख्यान पार पडले.
उद्घाटनप्रसंगी निवृत्त मुख्याध्यापक श्री. रवी तरळे, श्री. रामचंद्र कुद्रेमाणिकर, श्री. अनिल हेगडे, श्री. एन. के. कलकुंद्री, श्री. शंकर सांबरेकर, श्री. सागर कटगेनायर, श्री. भरमा चौगुले, श्री. शंकर आप्पुगोळे, श्री. नागेश चौगुले, मुख्याध्यापक श्री. वाय. के. नाईक, श्रीमती नावगेकर, श्री. शिंदे, श्रीमती ओऊळकर तसेच विज्ञान शिक्षक श्री. राक्षे यांची उपस्थिती लक्षणीय ठरली. कार्यक्रमाचे नेटके सूत्रसंचालन व आभार प्रदर्शन गुरुवर्य श्री. प्रकाश बेळगुंदकर यांनी केले.
सदर व्याख्यानमाला पुढील सलग पाच रविवार चालणार असून, दहावीत शिकणाऱ्या विद्यार्थ्यांनी या उपक्रमाचा लाभ घ्यावा, असे आवाहन संयोजक श्री. आर. एम. चौगुले यांनी केले आहे.
व्याख्यानांचा तपशील (इयत्ता १० वी – मराठी माध्यम):
- 21/12/2025 – मराठी : श्री. सी. वाय. पाटील
- 28/12/2025 – कन्नड : श्री. संजीव कोस्ती
- 04/01/2026 – विज्ञान : सौ. सविता पवार
- 11/01/2026 – सामाजिक शास्त्र : श्री. इंद्रजीत मोरे
- 18/01/2026 – गणित : श्री. पी. आर. पाटील
- 25/01/2026 – इंग्रजी : श्री. सुनील लाड
